მსოფლიო ბანკის წარმომადგენელი მიგელ ედუარდო სანჩეს მარტინი საქართველოს ეროვნულ ბანკთან თანამშრომლობას ნაყოფიერს უწოდებს და იმედოვნებს, რომ ბანკი საქართველოს პარლამენტში სებ-ის კანონზე ვეტოს დაძლევის შემდეგ, კვლავ ეფექტური და დამოუკიდებელი ინსტიტუტი იქნება.
„წლების განმავლობაში ეფექტური და ნაყოფიერი თანამშრომლობა გვქონდა საქართველოს ეროვნული ბანკთან. ვიმედოვნებთ, რომ ეროვნული ბანკი კვლავაც დარჩება ეფექტური და დამოუკიდებელი ინსტიტუტი, რომელიც უზრუნველყოფს ეკონომიკურ სტაბილურობას“, - ამის შესახებ მსოფლიო ბანკის წარმომადგენელმა მიგელ ედუარდო სანჩეს მარტინიმ საქართველოს ეროვნული ბანკისა და მსოფლიო ბანკის ერთობლივ პრეზენტაციაზე განაცხადა, სადაც მსოფლიო ბანკის მიერ მომზადებული გლობალური ეკონომიკის პერსპექტივების უახლესი ანგარიში წარადგინეს.
უმრავლესობის ინიციატივით მიღებული საკანონმდებლო ცვლილების მიხედვით, რომელსაც საქართველოს პრეზიდენტმა მანამდე ვეტო დაადო, ეროვნული ბანკის საბჭოში ახალი აღმასრულებელი თანამდებობის - პირველი ვიცე-პრეზიდენტის პოსტის შემოღება ხდება.
ეროვნული ბანკის პირველი ვიცე-პრეზიდენტი ეროვნული ბანკის პრეზიდენტის არყოფნის შემთხვევაში მის მოვალეობას შეასრულებს.
კანონპროექტი პარლამენტმა თებერვალში მიიღო და პარლამენტს თებერვალშივე პრეზიდენტის ე.წ. მოტივირებული შენიშვნები წარედგინა, სადაც პრეზიდენტი აღნიშნა, რომ ეროვნული ბანკის საბჭოში დამატებითი თანამდებობის შემოღების საჭიროებას ვერ ხედავს.
„პარლამენტის მიერ მიღებული ცვლილებების თანახმად, გარკვეული პერიოდით საქართველოს ეროვნული ბანკის საბჭოში ცხრა წევრიდან ხუთი აღმასრულებელი იქნება, ხოლო ოთხი - არააღმასრულებელი წევრი. ამგვარად გარკვეული პერიოდში საბჭოს აღმასრულებელი და არააღმასრულებელ წევრთა შორის ბალანსი ირღვევა. ეს მიუღებელია და რისკის ქვეშ აყენებს ეროვნული ბანკის საბჭოს, როგორც დამოუკიდებელი ზედამხედველი ორგანოს როლს. აღნიშნულ რისკზე მიუთითებენ საერთაშორისო სავალუტო ფონდი და შესაბამისი დარგის ექსპერტები“, - აცხადებს პრეზიდენტი, რომლის შეფასებითაც, კანონპროექტის დაჩქარებული წესით მიღების რეალური საჭიროება არ არსებობდა.
გასულ კვირას, „ქართული ოცნების“ პოლიტიკურმა საბჭომ გაავრცელა განცხადება, რომლის მიხედვითაც, „იკვეთება აშკარა ნიშნები იმისა, რომ საქართველოს პრეზიდენტი თავისი ქმედებებით ეროვნული ბანკის ჯეროვან საქმიანობას მიზანმიმართულად უქმნის დაბრკოლებას“.
შეგახსენებთ, რომ ეროვნული ბანკის მოქმედ პრეზიდენტს, კობა გვენეტაძეს ვადა 2 მარტს ამოეწურა და ამ დრომდე უცნობია, ვინ იქნება მისი შემცვლელი.
უახლესი
