ანაკლიის ღრმაწყლოვანი პორტის მშენებლობა 2024 წელს დაიწყება და ამისათვის 2023-2024 წლებში 70 მლნ ლარის დახარჯვა მოხდება. როგორც მთავრობის სხდომის დასრულების შემდეგ ფინანსთა მინისტრმა განაცხადა, 2024 წლის ბიუჯეტის პროექტით ანაკლიის პორტის მშენებლობისთვის 50 მლნ ლარი იქნება გამოყოფილი.
„ეკონომიკის სამინისტროსთვის გამოიყოფა 150 მლნ ლარი, ისეთი მნიშვნელოვანი პროექტებისთვის როგორიცაა ანაკლიის ღრმაწყლოვანი პორტის მშენებლობა. ამ მიზნით 20 მლნ ლარი წელს გამოვყავით, ხოლო 50 მლნ ლარი იქნება გამოყოფილი მომდევნო წელს. ჯამში 70 მლნ ლარი. თქვენ იცით, რომ ახლა მიმდინარეობს ანაკლიის ღრმაწყლოვანი პორტის ინვესტორის შერჩევა და შესაბამისად სახელმწიფო უზრუნველყოფს თავისი წილის პროპორციულად იმ თანხების დახარჯვას რა თანხებიც იქნება საჭირო იმისთვის, რომ პორტის მშენებლობა დაიწყოს მომდევნო წელს. გარდა ამისა განახლდება ინფრასტრუქტურა აეროპორტებში: ქუთაისის საერთაშორისო აეროპორტში, ასევე თელავის აეროპორტში მშენებლობა იგეგმება ასევე განხორციელდება ვაზიანის სრულიად ახალი აეროპორტის ტექნიკურ ეკონომიკური კვლევა“, - განაცხადა ლაშა ხუციშვილმა.
