სამაგიდო თამაშების მოყვარულებს Gorgasali Battle Royale-ის შეძენა უკვე VELI.store -ზეც შეუძლიათ

BG Era Games / ბიჯი ერა გეიმსის პოპულარული თამაში ,,გორგასალი“ უკვე VELI.store-ზეც ხელმისაწვდომია. კომპანიისთვის წლევანდელი სეზონი განსაკუთრებით აქტიურია. როგორც Business Insider Georgia- თან BG Era Games -ის თანადამფუძნებელი ვახტანგ ინორაძე ამბობს, უახლოეს მომავალში ორი ახალი თამაში დაემატება.

მნიშვნელოვანი სიახლეა, რომ „მეგალომანია“ გახდა ერთადერთი ქართული სამაგიდო თამაში, რომელიც ხელმისაწვდომია მსოფლიოს ყველაზე დიდ სამაგიდო თამაშების ონლაინ პლატფორმაზე, boardgamearena.com-ზე.

,,სამაგიდო თამაშები მომხმარებლებისთვის სხვადასხვა არხის მეშვეობით მარტივად ხელმისაწვდომია. შესაბამისად, დიდი ინტერესია რეგიონებშიც, სადაც ჩვენი ნამუშევრები უკვე ძალიან პოპულარულია და მოთხოვნა მუდმივად მატულობს. უკვე VELI.store -თან მივაღწიეთ შეთანხმებას და იქაც განთავსდა ჩვენი პროდუქტი. ,,გორგასლის“ შემდეგ შექმნილი თამაში ,,მეგალომანია“ კი boardgamearena.com-ზე გამოჩნდა, რაც მნიშვნელოვანი ფაქტია. ეს არის სამაგიდო თამაშების ყველაზე დიდი პლატფორმა მსოფლიოში, რომელსაც თვეში 15 მილიონი უნიკალური მომხმარებელი ჰყავს. დამატებით ვმუშაობთ ახალ თამაშზე, რომელიც მალე გამოვა. სამაგიდო თამაშების ბაზარზე საბოლოოდ  4 ახალი თამაში დაგვემატება“, - ამბობს ვახტანგ ინორაძე.

BG Era Games -ის თანადამფუძნებელი სამაგიდო თამაშების სირთულეზეც დასძენს და აცხადებს, რომ  იდეის შემუშავება და შემდეგ ამ იდეის სისრულეში მოყვანა საკმაოდ რთულია, რის დაძლევაც თამასების შემქმნელებს უწევთ.

,,თემატიკის მოფიქრება, მექანიკის შემუშავება, ისტორიის შექმნა და დაბალანსება გარკვეულ სირთულესთან არის დაკავშირებული. უნდა მოიგონო იდეა, რომელიც საინტერესო იქნება ყველასთვის, უნიკალური და ყველა სხვა თამაშისგან განსხვავებული. ეს მაშინ, როცა 100 000 თამაში არსებობს მსოფლიოში და განსხვავებული პროდუქტი უნდა შესთავაზო. სხვა მხრივ, უშუალოდ თამაშის წარმოების კუთხით, სირთულეები თითქმის არ არის, დღეს უკვე ადვილად ხელმისაწვდომია  საერთაშორისო  სტამბა, სადაც შექმნილი თამაშის დაბეჭდვა  მაღალი ხარისხით და მისაღებ ფასად არის შესაძლებელი“, - ამბობს ვახტანგ ინორაძე.

რაც შეეხება თამაშების ღირებულებას, ძირითადად სტანდარტულია, მათ შორის  VELI.store -ზე, სადაც BG Era Games -ის თამაშის შეძენა მომხმარებლებს 179 ლარად შეუძლიათ.