დღეიდან SMS რეკლამები იზღუდება

1-ელი მარტიდან არასასურველი სარეკლამო SMS-ების წინასწარი თანხმობის გარეშე გაგზავნა იკრძალება.  ცვლილებას პერსონალურ მონაცემთა დაცვის შესახებ ახალი კანონი ითვალისწინებს.

შეტყობინება უნდა გაიგზავნოს მხოლოდ წინასწარი თანხმობის შემთხვევაში;

სარეკლამო შეტყობინების მიღებაზე უარის თქმა შეიძლება ნებისმიერ დროს - კომპანია ვალდებულია 7 სამუშაო დღეში დააკმაყოფილოს მოთხოვნა;

 შეტყობინების მიღებაზე უარის თქმა შესაძლებელი უნდა იყოს მარტივი გზით.

თუ სარეკლამო შეტყობინების გაგზავნის წესი დაირღვევა, პერსონალურ მონაცემთა დაცვის სამსახური მიმართვის საფუძველზე განიხილავს საჩივარს და დააკისრებს ჯარიმას, რომლის ოდენობაა:

•  500 ათას ლარამდე ბრუნვის მქონე კომპანიაზე ან მეწარმეზე - 2000 ლარი;
•  უფრო დიდი ბრუნვის მქონე კომპანიებისთვის - 3000 ლარი;
•  დამამძიმებელი გარემოების აღმოჩენის შემთხვევაში ჯარიმები იზრდება.

ნებისმიერი საჯარო დაწესებულება და ასევე კერძო კომპანიათა ნაწილი ვალდებული იქნება ჰყავდეს პერსონალურ მონაცემთა დაცვის ოფიცერი

განისაზღვრა ის დაწესებულებები, რომლებშიც სავალდებულო იქნება პერსონალურ მონაცემთა დაცვის ოფიცრის (თანამშრომელი, რომელიც პასუხისმგებელი იქნება ორგანიზაციაში პერსონალური მონაცემების დამუშავებაზე) არსებობა, ესენია:

• საჯარო დაწესებულება (გარდა რელიგიური და პოლიტიკური ორგანიზაციებისა): 
• სადაზღვევო ორგანიზაცია
• კომერციული ბანკი
• მიკროსაფინანსო ორგანიზაცია
• საკრედიტო ბიურო
• ელექტრონული კომუნიკაციის კომპანია
• ავიაკომპანია
• აეროპორტი
• სამედიცინო დაწესება, რომელიც მომსახურებას უწევს წელიწადში არანაკლებ 10 000 მონაცემთა სუბიექტს
• ორგანიზაცია, რომელიც ამუშავებს დიდი რაოდენობით[1] მონაცემთა სუბიექტების მონაცემებს ან ახორციელებს მათი ქცევის სისტემატურ და მასშტაბურ მონიტორინგს.

პერსონალურ მონაცემთა დაცვის ოფიცერს უფლება აქვს, შეასრულოს სხვა ფუნქციაც, თუ ეს არ წარმოშობს ინტერესთა კონფლიქტს. პერსონალურ მონაცეთმა ოფიცრის ფუნქციების შესასრულებლად ორგანიზაციამ შეიძლება დადოს მომსახურების ხელშეკრულება.

ეს ცვლილება ამოქმედდება 2024 წლის 1-ელი ივნისიდან.