აზერბაიჯანის, ყაზახეთის, ჩინეთისა და საქართველოს სარკინიგზო დეპარტამენტები, შუა დერეფანში ტვირთბრუნვის გაზრდაზე შეთანხმდნენ

აზერბაიჯანის, ყაზახეთის, ჩინეთისა და საქართველოს სარკინიგზო დეპარტამენტების წარმომადგენლები პეკინში გამართულ შეხვედრაზე შეთანხმდნენ ტრანსკასპიური საერთაშორისო სატრანსპორტო მარშრუტის გასწვრივ მოძრაობის მოცულობის გაზრდაზე (TMTM, შუა დერეფანი).

ამის შესახებ აზერბაიჯანული მედია ყაზახეთის რკინიგზის (KTZ) შეტყობინებაზე დაყრდნობით იუწყება.

„პეკინში KTZ Express-ის (KTZ შვილობილი კომპანია) ხელმძღვანელობამ ჩინეთის, საქართველოსა და აზერბაიჯანის რკინიგზის წარმომადგენლებთან ერთად მონაწილეობა მიიღო TMTM ექსპერტთა შეხვედრაში“, - ნათქვამია ინფორმაციაში.

KTZ-ის ცნობით, შეხვედრაზე შეჯამდა მარშრუტის 2024 წლის მუშაობის შედეგები, განიხილეს განხორციელებული პროექტები და მომავალი წლის გეგმები.

„განსაკუთრებული ყურადღება ეთმობა TMTM-ის შემდგომი განვითარების გეგმებს. მოლაპარაკებების დროს მხარეები შეთანხმდნენ TCTM-ის გასწვრივ ტრანსპორტირების მოცულობის გაზრდაზე. მიღწეულია შეთანხმებები ჩინეთიდან TMTM-ით გაგზავნილი საკონტეინერო მატარებლების რაოდენობა დღეში ოთხამდე გაიზარდოს, რაც ორჯერ აღემატება არსებულ მაჩვენებელს“, - ნათქვამია ინფორმაციაში.

გარდა ამისა, ლოგისტიკური პროცესების ეფექტურობისა და გამჭვირვალობის გაზრდის მიზნით, მხარეებმა განიხილეს ტვირთების ნაკადების თვალთვალისა და მართვის ერთიანი ციფრული პლატფორმის შემუშავების შესაძლებლობა.

„KTZ აგრძელებს TMTM-ის აქტიურ განვითარებას, საერთაშორისო თანამშრომლობის გაძლიერებას და სატრანსპორტო ინფრასტრუქტურის გაუმჯობესებაში წვლილის შეტანას. ეს მცდელობები ხსნის ახალ შესაძლებლობებს ყაზახეთის სატრანზიტო პოტენციალისა და მარშრუტის გასწვრივ მთელი მიწოდების ჯაჭვის გაზრდის მიზნით“, - ნათქვამია ინფორმაციაში.

ტრანსკასპიური საერთაშორისო სატრანსპორტო მარშრუტი, ასევე ცნობილი როგორც შუა დერეფანი, არის საერთაშორისო სატრანსპორტო მარშრუტი, რომელიც გადის ჩინეთის, ყაზახეთის, კასპიის ზღვის, აზერბაიჯანის, საქართველოსა და შემდგომ თურქეთისა და ევროპის ქვეყნების გავლით. დერეფნის ნაწილია ბაქო-თბილისი-ყარსის რკინიგზა.