შალვა პაპუაშვილი აზერბაიჯანის მილი მეჯლისის დელეგაციას შეხვდა

პარლამენტის თავმჯდომარე შალვა პაპუაშვილი აზერბაიჯანის რესპუბლიკის მილი მეჯლისის კომიტეტების თავმჯდომარეებს შეხვდა.

შეხვედრაზე ყურადღება გამახვილდა საქართველოსა და აზერბაიჯანს შორის მტკიცე მეგობრობასა და ნაყოფიერ თანამშრომლობაზე. საუბარი შეეხო საპარლამენტო კავშირებს, რომლებიც ქმედითია როგორც საკანონმდებლო ორგანოების თავმჯდომარეების ურთიერთობაში, ისე, თემატურ კომიტეტებს შორის. აღინიშნა მაღალი დონის ვიზიტების მნიშვნელობა კავშირების შემდგომი განვითარებისთვის.

ხაზი გაესვა საქართველოს და აზერბაიჯანის ხელისუფლებების პოლიტიკურ ხედვებსა და პრიორიტეტებს, რომლებიც სუვერენიტეტისა და ეროვნული ინტერესების დაცვაზე და მოსახლების კეთილდღეობაზეა ორიენტირებული.

საუბარი შეეხო სამხრეთ კავკასიის რეგიონში არსებულ ვითარებას. ხაზი გაესვა აზერბაიჯანსა და სომხეთს შორის სამშვიდობო ხელშეკრულების მნიშვნელობას.

შალვა პაპუაშვილმა, ასევე, აღნიშნა საქართველოს, აზერბაიჯანსა და თურქეთს შორის ნაყოფიერი თანამშრომლობა სამმხრივ ფორმატში.

შალვა პაპუაშვილმა აზერბაიჯანულ მხარეს მადლობა გადაუხადა საქართველოს სუვერენიტეტისა და ტერიტორიული მთლიანობის მხარდაჭერისთვის და, ამ მხრივ, აზერბაიჯანისადმი მხარდაჭერა დაადასტურა.

შეხვედრაში, აგრეთვე, მონაწილეობა მიიღო განათლების, მეცნიერებისა და ახალგაზრდულ საქმეთა კომიტეტის თავმჯდომარე გივი მიქანაძემ.