მიკრო, მცირე და საშუალო ბიზნესების ფინანსებზე წვდომის ხელშეწყობით მდგრადი და გრძელვადიანი ეკონომიკური ზრდისთვის ძლიერ საფუძველს ვქმნით - ნათია თურნავა

ეროვნული ბანკის პრეზიდენტის მოვალეობის შემსრულებელმა ნათია თურნავამ "ტერაბანკსა" და ნიდერლანდების განვითარების ბანკს (FMO) შორის თანამშრომლობის შესახებ შეთანხმების ხელმოწერის ცერემონიაში მიიღო მონაწილეობა.

შეთანხმების თანახმად, "ტერაბანკი" საქართველოში პირველი ბანკი იქნება, რომელიც ნიდერლანდების განვითარების ბანკის (FMO) საგარანტიო პროგრამა NASIRA-ს განხორციელებას დაიწყებს. პროგრამა ქვეყანაში მოქმედი მიკრო, მცირე და საშუალო ბიზნესებისთვის ფინანსურ რესურსებზე ხელმისაწვდომობის გაზრდას ისახავს მიზნად. პროგრამა ევროკავშირისა და ნიდერლანდების მთავრობის დაფინანსებით ხორციელდება.

NASIRA სასესხო პორტფელის გარანტიას წარმოადგენს. იგი ეხმარება ფინანსურ ინსტიტუტებს, გააფართოონ საკრედიტო საქმიანობა მიკრო, მცირე და საშუალო მეწარმეებისთვის. ამასთან, განსაკუთრებული აქცენტი გააკეთონ მცირე ფერმერებზე, მეწარმე ქალებსა და ახალგაზრდა მეწარმეებზე, რომლებიც, უზრუნველყოფის არარსებობისა და მაღალი საკრედიტო რისკების გამო, ფინანსებზე ხელმისაწვდომობის კუთხით სირთულეებს ხშირად აწყდებიან. პროგრამის დახმარებით, ფინანსური ინსტიტუტები შეძლებენ, გაიზიარონ შესაძლო დანაკარგები, შეამცირონ რისკები, უფრო ინტენსიურად დააკრედიტონ ეს ჯგუფები და გაზარდონ შესაძლებლობები ახალი სეგმენტების ასათვისებლად.

როგორც ნათია თურნავამ სიტყვით გამოსვლისას აღნიშნა, ფინანსებზე წვდომა მიკრო, მცირე და საშუალო ბიზნესის წარმატებისთვის გადამწყვეტი ფაქტორია.

"მივესალმები NASIRA-ს საგარანტიო პროგრამის დაწყებას, რომელიც ხელს შეუწყობს ჩვენი მოქალაქეების მეტ ჩართულობას ეკონომიკურ საქმიანობაში და ინკლუზიურობის ზრდას. მჯერა, რომ აღნიშნული პროგრამა გააუმჯობესებს მიკრო, მცირე და საშუალო ბიზნესების ფინანსებზე წვდომას, განსაკუთრებით ქალი და ახალგაზრდა მეწარმეებისთვის. მათი ხელშეწყობითა და გაძლიერებით, ჩვენ ვქმნით ძლიერ საფუძველს მდგრადი და გრძელვადიანი ეკონომიკური ზრდისთვის", - აღნიშნა ნათია თურნავამ სიტყვით გამოსვლისას.