ბაკურიანში წარმატებით ჩატარებული ფრისტაილის, სნოუბორდისა და ფრისკის მსოფლიო ჩემპიონატის შემდეგ, აქტიურად ვაგრძელებთ თანამშრომლობას საერთაშორისო სათხილამურო ფედერაციასთან, - ამის შესახებ ეკონომიკისა და მდგრადი განვითარების მინისტრის მოადგილე მარიამ ქვრივიშვილმა საერთაშორისო სათხილამურო ფედერაციის (FIS) გენერალურ მდივანთან მიშელ ვიონთან შეხვედრის შემდეგ განაცხადა.
მისივე თქმით, მისასალმებელია, რომ ფედერაცია დადებითად აფასებს ბაკურიანის მსოფლიო ჩემპიონატს და საქართველოს მთავრობის მიერ გაწეულ სამუშაოებს ზამთრის კურორტების ინფრასტრუქტურული განვითარებისთვის, რაც იმის საფუძველი გახდა, რომ საქართველო დღეს უკვე არის ყოველწლიური სათხილამურო ჩემპიონატების მსოფლიო კალენდრის ნაწილი.
„სასიხარულო და საამაყოა, რომ გუდაური და ბაკურიანი მიმდინარე წლის ბოლოდან მომდევნო წლების განმავლობაში ყოველწლიურად უმასპინძლებს მსოფლიო თასებს, რაც რა თქმა უნდა, ჩვენი ქვეყნის მორიგი აღიარებაა და უდიდესი შესაძლებლობაა სამთო-სათხილამურო კურორტების განვითარებისა და პოპულარიზაციის კუთხით“, - აღნიშნა მარიამ ქვრივიშვილმა.
ამასთან, მინისტრის მოადგილის ინფორმაციით, საერთაშორისო სათხილამურო ფედერაციასთან ერთად, იწყება მუშაობა სვანეთში ოთხი სეზონის სასწავლო-საწვრთნელ პროექტზე, რომელიც განხორციელების შემთხვევაში, თავისი უნიკალური ინფრასტრუქტურით რეგიონში პირველი მსგავსი ტიპის, მაღალი დონის სპორტული ბაზა იქნება.
„ვიწყებთ მუშაობას მორიგ მასშტაბურ პროექტზე, რომელიც სვანეთში ოთხი სეზონის სასწავლო-საწვრთნელი ბაზის დაარსებას გულისხმობს. პროექტის განხორციელება ადგილობრივი და საერთაშორისო ექსპერტების ჩართულობით ჩატარებული ეკონომიკური მიზანშეწონილობისა და ტექნიკური კვლევების საფუძველზე მოხდება. პირველ ეტაპზე სწორედ ამ მიმართულებით დაიწყება მუშაობა“, - განაცხადა მარიამ ქვრივიშვილმა.
მინისტრის მოადგილის თქმით, აღნიშნული პროექტის განხორციელების შედეგად გაიზრდება რეგიონის ცნობადობა საერთაშორისო მასშტაბით და სვანეთი უფრო მიმზიდველი გახდება, როგორც ადგილობრივი და უცხოელი დამსვენებლისათვის, ისე ინვესტორებისთვის, რაც თავის მხრივ ხელს შეუწყობს საქართველოში ტურიზმის განვითარებას.
უახლესი
19 საათის წინ
დედაქალაქში „საახალწლო სოფელი“ გაიხსნა
