„ედის დაჩა“ გაფართოებას გეგმავს

წალკის მუნიციპალიტეტში, სოფელ დაშბაშში მდებარე საოჯახო სასტუმრო „ედის დაჩა“ დიდი პოპულარობით სარგებლობს. ობიექტი, ადგილზე მისულ სტუმარს მრავალსაუკუნოვან სახლში დასვენების შესაძლებლობას სთავაზობს. მეტი დეტალის გასაგებად Business Insider Georgia სასტუმროს დამფუძნებელს ედვარდ მკრტიჩიანს ესაუბრა.

როგორია კომპანიის საქმიანობის სპეციფიკა და რას სთავაზობთ  მომხმარებლებს?

სახლი არის 1936 წლის, რომლის სრული რესტავრაციაც მოვახდინეთ. პროცესი სამი წლის განმავლობაში მიმდინარეობდა. დავტოვეთ ძველებურ სტილში, რაც აღმოჩნდა ძალიან მოთხოვნადი და პოპულარული. იქიდან გამომდინარე, რომ ვმუშაობდით სხვადასხვა ფოკუს ჯგუფებთან აღმოვაჩინეთ რამდენიმე პრობლემა რეგიონში. პირველი იყო ის, რომ უმეტესობა გლემფინგი იყო, ან კოტეჯი, რაც არ არის იმდენად საინტერესო ჩვენი მომხმარებლისთვის. ამის შემდეგ გავხსენით ჩვენი პატარა კვების ობიექტიც და გვაქვს ჩვენი სამზარეულოც, სადაც მომხმარებელს ვთავაზობთ საუზმეს, სადილსა და ვახშამს. ამასთან ერთად პრობლემა იყო ის, რომ მომხმარებელი, რომელიც ჩამოდიოდა ეგრევე ბრუნდებოდა უკან თბილისში, რადგან თბილისთან ახლოს ვართ. ეს ფაქტორი, ერთგვარი პლუსიც არის და მინუსიც. აქედან გამომდინარე, გადავწყვიტეთ აგვეშენებინა კანიონის პირას დიდი ჯაკუზი და ორი ფინური აუზი კლდეში. სხვათა შორის, ძალიან პოპულარულია და დიდი მოთხოვნით სარგებლობს. გავედით ახალ სეგმენტზე, ვიზიდავთ სხვადასხვა კატეგორიის მომხმარებელს.

ჩვენს სამომავლო გეგმებს რაც შეეხება ვფიქრობთ გაფართოებაზე და დიდი ალბათობით ეს ამ წელს მოხდება. გარკვეულ საბუთებს ვაგროვებთ და ამის შემდეგ კიდევ ახალ ნომრებს დავამატებთ.

რამდენი ნომრისგან შედგება ამჟამად სასტუმრო?

ამჟამად, ხუთი ნომერი გვაქვს -  ერთი ეკონომი, ორი სტანდარტი და ორი ლუქსი.  სახლი არის ძალიან ძველი და ფიზიკურად მეტ ნომერს ვერ გავაკეთებდით. სწორედ ამიტომ ვაპირებთ ამ წელს გაფართოებას. აპრილის თვის წინასწარი ჯავშნების კუთხით დადებითი ტენდენცია შეინიშნება ბუქინგზე.  

როგორ აფასებთ მოთხოვნას ზოგადი თვალსაზრისით?

კონკრეტულად, ჩვენი სასტუმროს 85% ევროპელ მომხმარებელს მოიცავს. ეს არის: ბელგია, გერმანია, საფრანგეთი, ნიდერლანდები და ისრაელი. ყოფილი საბჭოთა ქვეყნებიდან 10% და 5% არის მარტო ადგილობრივი ვიზიტორი, ანუ საქართველოს მოქალაქე.

რას მიიჩნევთ კომპანიის კონკურენტულ უპირატესობად?

პირველი ეს არის, რომ მომხმარებელს ვთავაზობთ დასვენებას საუკუნოვან სახლში, სადაც ქვის კედლები გვაქვს და მუხის, ძველი  200 წლიანი მორები. მეორე და ყველაზე დიდი ჩვენი უპირატესობა, რომელიც განგვასხვავებს ყველასგან ეს არის რომ ჩვენი სასტუმროს მდებარეობა, რომელიც ზედ კანიონის პირას არის. ეს არის ერთადერთი სასტუმრო ამ რეგიონში მსგავსი მდებარეობით. მესამე, კანიონი არის დაცული ტერიტორია და დილით, რომ გამოდიხარ ჩვეულებრივ შეგიძლია ნახო როგორ დარბის შველი, ან როგორ დაფრინავენ თეთრი არწივები კანიონის მოპირდაპირე მხარეს.

დამატებითი კონკურენტული უპირატესობა არის ის, რომ ჩვენი სათბური გვაქვს, სადაც ვზრდით ეკოლოგიურად სუფთა ბოსტნეულს, რომელსაც ვიყენებთ ჩვენს სამზარეულოში.

რას მიიჩნევთ სექტორის ძირითად გამოწვევად?

რეგიონის პრობლემა მუშა ხელის ნაკლებობაა. ძალიან დიდი გადინება არის ახალგაზრდების, რის შედეგადაც გადავწყვიტეთ სხვა მიმართულებით წავსულიყავით. ვახორციელებთ ადგილობრივი მოსახლეობის გადამზადების პროცესს. ამ ეტაპზე გვყავს ოთხი ქალბატონი დასაქმებული. გენდერული თანასწორობის კუთხით მივდივართ. ამასთან ერთად დავასაქმეთ ოთხი ოჯახი. ვუყურებთ, რომ ახალგაზრდებში ჩნდება მეწარმეობის ინტერესი. ადრე თუ ვყიდულობდით უბრალო თაფლს, ახლა თავად გვთავაზობენ სხვადასხვა სახის თაფლს, რომელსაც სხვადასხვა ქილებში აფასოებენ, ეტიკეტირებას უკეთებენ. მახარებს ის ფაქტი, რომ ახალგაზრდებს ვასტიმულირებთ.

როგორია  გეგმები 2025 წლისთვის?

ვგეგმავთ გაფართოებას და ნომრების გაფართოებას. იქიდან გამომდინარე, რომ მოთხოვნა არის და ნომრები არ გვყოფნის.

ცნობისთვის, სასტუმროს ნომრები სრულად აღჭურვილია თანამედროვე ტექნიკითა და დასვენებისთვის საჭირო ინვენტარით. საოჯახო სასტუმროს გააჩნია მოსასვენებელი სივრცე და ბარი. სტუმარს შესაძლებლობა აქვს დროის ნებისმიერ მონაკვეთში ისარგებლოს ადგილობრივი სარესტორნო მომსახურებით.