Winery Erkeni საექსპორტო ბაზრებისა და ასორტიმენტის გაფართოებას გეგმავს

პრემიუმ ხარისხის, ქვევრის ღვინის მწარმოებელი კომპანია მეღვინეობა ერკენი • Winery Erkeni ბაზარზე 2024 წლიდან გამოჩნდა. პროდუქცია დანამატებს არ შეიცავს და მცირე რაოდენობით იწარმოება. ამის შესახებ Business Insider Georgia-ს კომპანიის დამფუძნებელმა გიორგი გივიშვილმა განუცხადა. მისივე თქმით, ამჟამინდელი წარმოება მასშტაბური არ არის და მცირე სეგმენტის ათვისებაზეა ორიენტირებული.

„ღვინის წარმოების პროცესი გაცილებით ადრე დავიწყე, თუმცა საქმე ბიზნესად წინა წელს ვაქციე. ამ ეტაპზე არ მაქვს მასშტაბური წარმოება და  დიდი ბრუნვა. ვაწარმოებ მცირეოდენს, თუმცა ხარისხიან ღვინოს, რომელიც არ შეიცავს დანამატს. ისეთ ხარისხს ვაწარმოებ, რაც ქართველ მომხმარებელს დააინტერესებს. მიზანი იყო ამეთვისებინა ის პატარა სეგმენტი, რაზეც იყო მოთხოვნა “, - ამბობს კომპანიის დამფუძნებელი.

 მეღვინეობა „ერკენი“ ოთხი სახეობის ღვინოს აწარმოებს, თუმცა სამომავლოდ ასორტიმენტის გაფართოებას გეგმავს.

„ამჟამად ვაწარმოებთ 4 სახეობის ღვინოს. რა თქმა უნდა ყველას ქვევრში. ეს არის საფერავი, ქისი, კახური მწვანე და ასევე ქინძმარაული მცირე რაოდენობით “, - აცხადებს გიორგი გივიშვილი.

კომპანია ექსპორტზე გასვლას უახლოეს პერიოდში გეგმავს, როგორც საბერძნეთში, ასევე გერმანიაში.

"ვგეგმავ ექსპორტს აპრილის ბოლოდან მცირე რაოდენობით გერმანიასა და საბერძნეთში, სადაც რამდენიმე მაღაზიაა დაინტერესებული ჩვენი პროდუქციით.

როგორც მოგახსენეთ, ქვევრის ღვინოს ვაწარმოებ და ქვევრის სპეციფიკიდან გამომდინარე ინტერესიც თავისებურია. ვინც აგემოვნებს ჩვენს ღვინოს  ბევრ დადებით შეფასებასაც გვიტოვებს იქიდან გამომდინარე, რომ პრემიუმ ხარისხს ვაწარმოებთ “, - აღნიშნავს კომპანიის დამფუძნებელი გიორგი გივიშვილი.

მეღვინეობა ერკენი სამომავლოდ ასორტიმენტის გაფართოებას და ყურძნის ძველი ჯიშების დამატებას გეგმავს.

„რაც შეეხება სამომავლო გეგმებს, მომავალში ვფიქრობ რქაწითლის დამატებას და ასევე რამდენიმე ძველი ჯიშიც მინდა დავამატო. დაკვირვების პროცესში ვარ ამ კონკრეტულ ტერიტორიაზე, რამდენად შეძლებს გახარებას და რამდენად იქნება მოსავლიანი ისეთი ყურძნის ჯიშები, როგორიც არის მაგალითად, „ჩიტისთვალა“ და „ახმეტური წითელი“. თუ ამ ჯიშებმა შესაბამისი ხარისხი დადო აუცილებლად ვაწარმოებ ამ სახეობის ღვინოებსაც “, - განმარტავს კომპანიის დამფუძნებელი.
აღსანიშნავია, რომ კომპანიის მთავარი მიზანი ქართული ღვინის ტრადიციების შენარჩუნება და განვითარებაა.