სტუმრების რაოდენობა შეგვიმცირდა, ჯავშნები გავაუქმეთ - „შატო ატენი“

ატენის ერთადერთი რეგისტრირებული ცქრიალა ღვინოს მწარმოებელი სოსო ვანიშვილი Business Insider Georgia- თან ამბობს, ერთ თვეში „შატო ატენის“ ტერიტორიაზე კიდევ ორი კოტეჯის მშენებლობა დასრულდება და სამომავლოდ კიდევ 3 კოტეჯის დამატება სურს.

მცირე მარნის მფლობელის თქმით კოტეჯების გაქირავება პარალელური ბიზნესია, რომლის ფარგლებშიც კიდევ უფრო მეტი ტურისტის მიღებას შეძლებს. 

„2023 წელს სტუმრების 90% უცხოელები იყვნენ, უმეტესად გერმანიიდან. შატო ატენისთვის დატვირთული პერიოდი მაისიდან იწყება და შემდეგი 6 თვე გრძელდება და თებერვალში რამდენიმე ვიზიტორი გვყავდა. 2022 წელთან შედარებით სტუმრების რაოდენობა შეგვიმცირდა და მოგვიწია ჯავშნების გაუქმება, რაც სავარაუდოდ, მსოფლიოში მიმდინარე პროცესების, კერძოდ რუსეთ უკრაინის ომისა და ისრაელში განვითარებული მოვლენებს უკავშირდება“, - ამბობს სოსო ვანიშვილი.

რაც შეეხება „შატო ატენის“ კონკურენტულ უპირატესობას, კოტეჯებიდან იშლება ულამაზესი ხედი. როგორც სოსო ვანიშვილი ამბობს, შატოს ტერიტორიაზე გაიხსნა სარესტორნო სივრცე, სადაც სტუმრებს გემრიელი კერძებისა და უნიკალური ღვინის დაგემოვნება შეუძლიათ.

ცნობისთვის, ,,შატო ატენი" გორის მუნიციპალიტეტში, ატენის ხეობაში მდებარეობს. საოჯახო მარანი 2016 წლიდან დაფუძნდა. 2020 წელს კი საქართველოში წლის საუკეთესო მცირე მეღვინეობის ჯილდო მიიღო.