სებ-ი მორიგ დეზინფორმაციაზე: რეზერვების სტატისტიკა ქვეყნდება მაქსიმალური დეტალიზაციით და საერთაშორისოდ აღიარებული ფორმით

,,რეზერვების სტატისტიკა ქვეყნდება მაქსიმალური დეტალიზაციით, საერთაშორისოდ აღიარებული ფორმით და არა მხოლოდ ერთი კონკრეტული რიცხვი, რაც მსოფლიოს საუკეთესო პრაქტიკასთან შესაბამისობაშია“, - ამის შესახებ საქართველოს ეროვნულ ბანკში განგვიცხადეს.

საკითხი რომან გოცირიძის მხრიდან ეროვნული ბანკის მიერ რეზერვების სტატისტიკის გამოქვეყნების დაუსაბუთებელ კრიტიკას ეხება, რომლის შესახებაც სებ-ს დავუკავშირდით. აღნიშნულთან დაკავშირებით ეროვნული ბანკის პასუხს უცვლელად გთავაზობთ:

,,რომან გოცირიძის მიერ გავრცელებული დეზინფორმაციის  საპასუხოდ ვაცხადებთ, რომ ნოემბერში საერთაშორისო სავალუტო რეზერვების ზრდა ძირითადად ეროვნული ბანკის სავალუტო შესყიდვებმა განაპირობა, რის შედეგადაც რეზერვები 124.5 მლნ დოლარით შეივსო. ზრდის მიმართულებით ასევე იმოქმედა მთავრობის მიერ მიღებულმა სავალუტო ჩარიცხვებმა. რეზერვების მოცულობა გაზარდა ასევე,  დოლარიზაციის მატების გამო კომერციული ბანკების სარეზერვო ანგარიშებზე ნაშთების ზრდამ. თუმცა, ამავე დროს, რეზერვებზე კლების მიმართულებითაც იმოქმედა მთავრობის მიერ ვალის გადახდებმა, ოქროს ფასის ცვლილებამ  და დოლარის გლობალური გამყარების გამო ევროს და სპეციალური ნასესხობის უფლებებში განთავსებული აქტივების ღირებულების გადაფასებამ.

ამ ფაქტორების ურთიერთქმედებამ განაპირობა სწორედ სარეზერვო აქტივების ზრდა 39 მლნ აშშ დოლარით.   რაც შეეხება, რომან გოცირიძის კიდევ ერთ ბრალდებას, რეზერვების სტატისტიკის გამოუქვეყნებლობასთან დაკავშირებით, ხაზგასმით ავღნიშნავთ, რომ სტატისტიკა ქვეყნდება მაქსიმალური დეტალიზაციით, საერთაშორისოდ აღიარებული ფორმით და არა მხოლოდ ერთი კონკრეტული რიცხვი, რაც მსოფლიოს საუკეთესო პრაქტიკასთან შესაბამისობაშია.

რომან გოცირიძის მხრიდან მსგავსი დეზინფორმაციის გამოქვეყნება (უკვე მერამდენედ)  მიზნად ისახავს პოლიტიკურ სპეკულაციას,  მოქალაქეების  განზრახ შეცდომაში შეყვანის და ეროვნული ბანკის დისკრედიტაციის მცდელობას“, - განგვიცხადეს სებ-ში.