საშინაო და საკლასო დავალებების სავალდებულოობა გავაუქმეთ - ეს არის მასწავლებლების მრავალი წლის მოთხოვნა - მინისტრი

საქართველოს განათლებისა და მეცნიერების მინისტრი, გიორგი ამილახვარი დღეს გამართულ ბრიფინგზე ეროვნულ სასწავლო გეგმაში ცვლილებებს გამოეხმაურა.

[საშინაო და საკლასო დავალებების] სავალდებულოობა გავაუქმეთ, მივეცით მეტი აკადემიური თავისუფლება და აქვე მზად ვართ ყველა სერვისი აღმოვუჩინოთ სკოლებს, - განაცხადა მინისტრმა. 

მისივე თქმით, მასწავლებელს მიენიჭა მეტი უფლება, რომ თვითონ განსაზღვრონ, დაგეგმონ, როგორი შეფასების მეთოდი და ფორმულა აქვთ. 

„არავის არაფერი არ გაუუქმებია. შედით რომელიმე სკოლაში და ჰკითხეთ მასწავლებლებს, ეს რომ მოხდა არის კარგი თუ ცუდი? მათი და ბავშვების ინტერესებში შედის, თუ არა? სავალდებულოობა გაუქმდა და არა საშინაო დავალება.

შესაბამისად, სკოლას, მასწავლებელს იმ ავტონომიის ფარგლებში, რომელზეც ჩვენ ვსაუბრობთ (დეკემბერში ამასთან დაკავშირებით საჯარო პრეზენტაცია გვექნება), მივანიჭეთ მეტი უფლებამოსილება თვითონ განსაზღვრონ, დაგეგმონ, როგორი შეფასების მეთოდი და ფორმულა აქვთ და არა ის, რომ რამე გავაუქმეთ. აქვე ვეუბნებით, რომ ნებისმიერ მათ შერჩეულ ფორმაში და მეთოდში სამინისტრო, შესაბამისი ჩვენი სსიპ-ები და სტრუქტურები მზად არიან სერვისები აღმოუჩინონ, ანუ დაეხმარონ მათ დანერგვაში. ეს პირიქითაა, რამე კი არ გავაუქმეთ, მასწავლებლების უმრავლესობის მოთხოვნაა წლების განმავლობაში, რომ მათ მივანიჭოთ მეტი აკადემიური თავისუფლება, მივცეთ შესაძლებლობა, რომ ცენტრალიზებული, ასე ვთქვათ, ბრძანების თუ მითითების მიღმა ჰქონდეთ შესაძლებლობა ესა თუ ის საგანი, თუ კლასი, საათობრივი ბადე, სასწავლო გეგმა სკოლამ თავად დაგეგმოს, ვინაიდან მათ უკეთ იციან ადგილზე, სკოლებში თავიანთ მოსწავლეებს რა სჭირდებათ, ვიდრე შესაძლოა სამინისტროში იყოს. ამიტომ ჩვენ ეს სივრცე გავხსენით, შევქმენით და არა ის, რომ ახლა აქ ვინმე ზის სამინისტროში და არ ესმის საშინაო დავალების არსი, ისე როგორც ტირაჟირებს ზოგიერთი სააგენტო. სავალდებულოობა გავაუქმეთ, მივეცით მეტი აკადემიური თავისუფლება და აქვე მზად ვართ ყველა სერვისი აღმოუჩინოთ მათ.

ჩვენ არავის თავზე არაფერს არ მოვახვევთ, არავის არაფერი გაუნულდება ან არავის დავავალდებულებთ, რომ ძველი მიატოვოს და ახალზე გადავიდეს. ჩვენ უბრალოდ არ გვინდოდა ახალ სასწავლო წლამდე დალოდება, ანუ 2024 წლის სექტემბრამდე. შესაბამისად, ახლაც არაფერი სავალდებულო აქ არ არის და ასე ვთქვათ საგანგაშო.

სამწუხაროდ, დღეს სკოლებში ჩვენ არ გვაქვს ეროვნული შეფასება, ანუ განმსაზღვრელი შეფასება, რომელიც ადამიანის სკოლის დამთავრება-არდამთავრებას აფასებს. ჩვენ გვაქვს ის შეფასების მოდელი, რომელიც დღეს სკოლებში გვაქვს. აქაც ჩვენ მასწავლებლებს და დირექტორებს მარტო არ დავტოვებთ, ამ შეფასებაში და ეს პირიქითაა, ეს არ არის ჩემი ან ორი ადამიანის გადაწყვეტილება, ეს არის მასწავლებლების მოთხოვნა მრავალი წლის განმავლობაში, რომელსაც ჩვენ ვუპასუხეთ და მივეცით მეტი აკადემიური თავისუფლება“, - განაცხადა მინისტრმა.