გარემოსდაცვითი ინფორმაციისა და განათლების ცენტრმა პროექტის „საქართველოს V ეროვნული შეტყობინებისა და I ორწლიური გამჭვირვალობის ანგარიშის შემუშავება გაეროს კლიმატის ცვლილების ჩარჩო კონვენციის (UNFCCC) მიმართ“ (5NC/1BTR) ფარგლებში, დაინტერესებულ მხარეებთან გამართულ შეხვედრაზე სათბურის აირების ეროვნული ინვენტარიზაციის დოკუმენტი განიხილეს.
შეხვედრა გარემოსდაცვითი ინფორმაციისა და განათლების ცენტრის დირექტორმა თამარ ალადაშვილმა გახსნა, რომელმაც ხაზი გაუსვა დოკუმენტის, როგორც NC/BTR ანგარიშგების მნიშვნელოვან კომპონენტს და აღნიშნა, რომ წარმოდგენილი ინფორმაცია სათბურის აირების ემისიებისა და შთანთქმის შესახებ შესაძლებელს გახდის შეფასდეს შემარბილებელი ქმედებების შედეგები და მათი წვლილი NDC მიზნების მიღწევაში.
ცენტრის ექსპერტებმა დაინტერესებულ მხარეებს დეტალური ინფორმაცია მიაწოდეს საქართველოში სათბურის აირების გაფრქვევა/შთანთქმის განახლებული მონაცემებისა და ტენდენციების შესახებ. მონაწილეებმა იმსჯელეს მონაცემთა მოპოვების მეთოდოლოგიასა და შემდგომი ინვენტარიზაციების გაუმჯობესების შესაძლებლობებზე.
შეხვედრას გარემოს დაცვისა და სოფლის მეურნეობის სამინისტროს გარემოსა და კლიმატის ცვლილების დეპარტამენტის ხელმძღვანელის მოადგილე მაია ჯავახიშვილი, გაეროს განვითარების პროგრამის (UNDP) გარემოსა და ენერგეტიკის მიმართულების ხელმძღვანელი ნინო ანთაძე, სახელმწიფო, საერთაშორისო, არასამთავრობო და კერძო სექტორების წარმომადგენლები ესწრებოდნენ.
პროექტი „საქართველოს V ეროვნული შეტყობინებისა და I ორწლიური გამჭვირვალობის ანგარიშის შემუშავება გაეროს კლიმატის ცვლილების ჩარჩო კონვენციის (UNFCCC) მიმართ“ ხორციელდება გლობალური გარემოსდაცვითი ფონდისა (GEF) და გაეროს განვითარების პროგრამის (UNDP) მხარდაჭერით.
უახლესი
1 საათის წინ
1 დოლარის ოფიციალური ღირებულება 2.8004 ლარია
