რას სთავაზობს Good Choice მომხმარებლებს და რა არის მისი კონკურენტული უპირატესობა 

გაყიდვებში ნორმალური ზრდა გვქონდა, - ასე აფასებს Business Insider Georgia-სთან საუბრისას სწრაფი კვების ობიექტების ქსელის Good Choice • გუდ ჩოის დამფუძნებელი გოგა სტეფანიშვილი 2024 წლის გაყიდვებს.

,,გუდ ჩოის“-ის ისტორია 2017 წლიდან იწყება და დღეს ქსელი თბილისის მასშტაბით 4 ფილიალს აერთიანებს.

„Good Choice • გუდ ჩოის"-ის ისტორია 2017 წელს დაიწყო და ეს იყო GEM Fest-ზე. ანუ პირველად „გუდ ჩოის“ სახელით GEM Fest-ზე წარვდექით და ამის შემდეგ დაიწყო ჩვენი განვითარება. ჩვენი პირველი ფილიალი ლისის ტბაზე გავხსენით და ამის შემდეგ დაემატა ვაჟა-ფშაველას, სოლოლაკის ფილიალი და მერე იყო დიდი დიღმის ფილიალი. ახლა გაქვს 4 მოქმედი ფილიალი, რომლიდანაც ერთი სეზონურია და გაზაფხული-ზაფხულის განმავლობაში მუშაობს და ასევე შემოდგომით. ზამთარში დაკეტილია. ლისის ტბის ფილიალზე ვსაუბრობ“, - აცხადებს გოგა სტეფანიშვილი.

მისივე განმარტებით, „გუდ ჩოის“ გაფართოების უახლოესი პერიოდის გეგმა ამ დროისათვის რეგიონებში გასვლას არ ითვალისწინებს. თუმცა კომპანია არც თბილისში აპირებს მიმდინარე წელს გაფართოებას.

„ამ ეტაპზე რეგიონებში შესვლა არ იგეგმება, გამომდინარე იქიდან, რომ ჩვენთვის ძალიან მნიშვნელოვანია ხარისხი და ამ მიმართულებას ვუფრთხილდებით. ფიზიკურად არ გვაქვს იმის რესურსი ამ ეტაპისთვის, რომ რეგიონებში გავიშალოთ.

2025 წლის ბოლომდე თბილისში გაფართოებასაც არ განვიხილავთ. არსებული ფილიალები ლოკაციურად კარგად გვაქვს დაგეგმარებული. ისეთ უბნებზე ვართ, რომ ერთმანეთს ხელს არ უშლის. პირიქით, გაშლილია და მომხმარებლისთვის უფრო კომფორტულია“, - აცხადებს „გუდ ჩოის“ დამფუძნებელი.

ბოლო პერიოდში „გუდ ჩოისმა“ ასორტიმენტის გამრავალფეროვნებაზეც იზრუნა და მენიუს სხვადასხვა ხემსი დაამატა. 

„გუდ ჩოისში“ ძირითადად ბურგერები და ჰოტ-დოგები გვაქვს და ახლა დაგვემატა ხემსები, ყველის ბურთები, ნაგეთსები, ყველის ჩხირები და ასე შემდეგ. ყველა პროდუქტი საკმაოდ მოთხოვნადია და ჩვეულებრივად მუშაობს“, - ამბობს გოგა სტეფანიშვილი.

„გუდ ჩოის“ დამფუძნებლის თქმით, მათი ობიექტები ერთნაირად მიმზიდველია როგორც ადგილობრივი, ისე უცხოელი მომხმარებლებისათვის. 

„არის ფილიალები, სადაც ძირითადად უცხოელი მომხმარებლები გვყავს და არის ფილიალი, სადაც ძირითადად ქართველი მომხმარებელი შემოდის. სოლოლაკის ფილიალი უფრო დატვირთულია უცხოელების თვალსაზრისით. თუმცა, ბოლო პერიოდში კლება იგრძნობოდა. სამწუხაროდ ბოლო პერიოდში უცხოელი სტუმრების კლებაა.

კიდევ ერთხელ ვიმეორებ, ჩვენთვის მთავარია ხარისხი, ხარისხს არ ვაფუჭებთ და ვინც ჩვენი ხარისხის ამბავი იცის გვსტუმრობენ. ძალიან ბევრი ერთგული და ხშირი სტუმარი გვყავს“, - აცხადებს „გუდ ჩოის“ დამფუძნებელი.

ირკვევა, რომ დღეს  „გუდ ჩოის“ მთავარი კონკურენტული უპირატესობა მაღალი ხარისხი და გემოებია.

„ჩვენი კონკურენტული უპირატესობაა ადეკვატური ფასი, სწორი დამოკიდებულება მომხმარებელთან. მომხმარებელთან საკმაოდ გახსნილი და უშუალო ურთიერთობა გაქვს და პლუს ამას, ყველაზე მთავარი რაც არის, ხარისხი გვაქვს ძალიან მაღალი და პლუს გემოები. შეიძლება ხმამაღალი განაცხადია, მაგრამ ვფიქრობ, რომ ერთ-ერთი გამორჩეული გემოები გაქვს თბილისში. ასევე გვაქვს გაუყინავი პროდუქცია, რაც ასევე მნიშვნელოვანია“,  - აცხადებს „გუდ ჩოის“ დამფუძნებელი.

გოგა სტეფანიშვილი ამბობს, რომ  „გუდ ჩოის“ - ის ბურგერები გაუყინავი ხორცისგან მზადდება, რაც მათ გემოვნურ თვისებებზეც აისახება. 

„ხორცი, რასაც ბურგერში ვიყენებთ (საქონლის და ღორის) 100%-ით გაუყინავი ხორცია“, - აცხადებს   გოგა სტეფანიშვილი. ირკვევა, რომ კომპანია წლების ერთი მიმწოდებლისგან იღებს ხორცს და არ ხდება ნედლეულის ცვლა და შერევა.

რაც შეეხება მთავარ გამოწვევას, „გუდ ჩოის“ დამფუძნებლის აზრით, ეს იმპორტირებული პროდუქციის ფასებია, რასაც ხშირად მოგების მარშის შემცირებით აბალანსებენ. 

„ჩვენი მთავარი გამოწვევა იმპორტირებული ნედლეულის ფასის შენარჩუნება. რთულია დაიჭირო ხარისხი, როდესაც ევრო თამაშობს, რაც ევროპიდან შემოსულ პროდუქციაზე უარყოფითად აისახება და პირდაპირ პროპორციულია პროდუქციის ფასის ზრდასთან მიმართებაში. მაქსიმუმს ვაკეთებთ. გვირჩევნია, რომ ჩვენ მოვიკლოთ მოგების მარჟა და ფასები არ გავზარდოთ რაც შემდგომ მგრძნობიარედ აისახება ჩვენს სტუმრებზე და მომხმარებელზე. აქედან გამომდინარე ვცდილობთ, რომ მაქსიმალურად გვეჭიროს ფასიც და ხარისხიც“, - ამბობს  „გუდ ჩოის“ დამფუძნებელი.