რა ტიპის გამოწვევებია პროფესიული განათლების სექტორში - მაგდა მაღრაძის შეფასება

პროფესიული განათლების ერთ-ერთი გამოწვევა არის ის, რომ რეალურად საზოგადოებამ კარგად არ იცის თუ რა სიკეთეები მოაქვს ამ სექტორს და რატომ უნდა ჩაერთოს უფრო მეტი ადამიანი პროფესიულ განათლებაში, - ამის შესახებ ათასწლეულის გამოწვევის ფონდი - საქართველოს აღმასრულებელმა დირექტორმა მაგდა მაღრაძემ, პროფესიული განათლების სექტორში არსებულ პრობლემებზე საუბრისას განაცხადა.

 „იმედის დილაში“ რუბრიკა Business Insider Georgia-ში სტუმრობისას მაღრაძემ თქვა, რომ ,გამოწვევა ერთიანად აქტუალურია როგორც ახალგაზრდა თაობაში ისე ზრდასრულებში. 

„უმუშევრობა დღეს ჩვენი ქვეყნის ერთ-ერთი დიდი გამოწვევა გახლავთ, როგორც ახალგაზრდებში ისევე ზრდასრულებში. ერთ-ერთი მთავარი მიზეზი ამ პრობლემისა გახლავთ ის, რომ ქვეყანაში არ არის ბმა მიწოდებასა და მოთხოვნას შორის. ანუ არის მოთხოვნა განსაზღვრულ სექტორებში სპეციალისტებზე და მიწოდება შესაბამისი არ არის. დღეს უმაღლეს განათლებაშია ჩართული საზოგადოების უმეტესობა, მაშინ როდესაც პროფესიულ განათლებაში არის საჭიროება,რომ მეტი სტუდენტი გვყავდეს და მეტ ადამიანს შეეძლოს სწრაფად დაეუფლოს ახალ პროფესიას, მიიღოს ახალი უნარჩვევები და დასაქმდეს ასევე სწრაფად. მაგრამ საზოგადოების დიდი ნაწილი ირჩევს, მაინც უნივერსიტეტს და უმაღლეს განათლებას. სტატისტიკას თუ შევხედავთ 178 ათასი სტუდენტი გვყავს უმაღლესი განათლების, ხოლო 16 ათასი სტუდენტი გვყავს პროფესიული განათლების საფეხურზე“, - განაცხადა მაგდა მაღრაძემ.