კომპანია ,,ოჯახურის“ პროდუქტებზე მოთხოვნა გააქტიურდა. უკრაინის ბაზარზე საომარი მოქმედებების გამო გადაზიდვების შეზღუდვის პარალელურად ,,ოჯახურის" რეალიზაციამ დიდწილად საბერძნეთის, ჩეხეთის, კანადის, გერმანიის, ლატვიის და ავასტრალიის ბაზრებზე გადაინაცვლა.
რაც შეეხება ასორტიმენტს, კომპანიის მიერ წარმოებული ჯემები, კომპოტები და მწნილები ქვეყნის გარეთ ძალიან პოპულარულია.
„უკრაინაზე ჩვენი პროდუქციის ექსპორტის 30%- ზე მეტი მოდიოდა, მაგრამ ომის გამო გადაზიდვები შეგვიმცირდა. ამიტომ სწორება პარალელურ ბაზრებზე გავაკეთეთ, ამ ეტაპზე ჩვენი პროდუქცია წარმატებით იყიდება საბერძნეთში, ჩეხეთში, კანადაში, გერმანიაში, ლატვიისა და ავასტრალიაში, გარკვეული მოცულობა გადის რუსეთშიც. სამომავლოდ საექსპორტო მიმართულებით მუშაობა კიდევ უფრო გაძლიერდება. ჩვენი მთავარი მიზანია, შევინარჩუნოთ ხარისხი და გავზარდოთ ასორტიმენტი, შევქმნათ ახალი პროდუქტები და ერთად გავაგემრიელოთ კერძები ,,ოჯახურით“ როგორც ქართველი, ასევე უცხოელი მომხმარებლებისთვის“, - ამბობს კომპანიის მარკეტინგის მენეჯერი სალომე ნეფარიძე Business Insider Georgia- თან.
რაც შეეხება ნედლეულს, როგორც კომპანიაში განმარტავენ, წარმოებული პროდუქციის უმეტესი ნაწილი საქართველოში მოყვანილი პროდუქტების გადამუშავების შედეგად იწარმოება.
ექსპორტირებულ პროდუქტებს შორისაა თეთრი ბლის, კაკლის და საზამთროს მურაბები; მწვანე პომიდვრის, ნივრის და ჯონჯოლის მწნილები, ასევე კლასიკური და ცხარე საწებლები.
გასულ წელს „ოჯახურმა“ ექსპორტზე 100 000 ევროს ღირებულების ჯემები, კომპოტები და მარინადები გაიტანა. ცნობისთვის, „ოჯახური“ 2010 წელს დაარსდა. საწარმოში სტაბილურად 70 ადამიანია დასაქმებული.
უახლესი
