კომუნიკაციების კომისიის წევრი, ეკატერინე იმედაძე, ბარსელონაში გამართულ მობილური ტექნოლოგიის მსოფლიო კონგრესზე (MWC) სიტყვით წარსდგა. სესიაზე, რომელიც უსაფრთხოების მიმართულებით, ტელეკომუნიკაციებისა და ტექნოლოგიების სფეროში გლობალურ თანამშრომლობას შეეხებოდა, ეკატერინემ ყურადღება საქართველოს ციფრულ ჰაბად ჩამოყალიბების შესაძლებლობაზე გაამახვილა: „საქართველო გეოგრაფიულად ევროპისა და აზიის გასაყარზე მდებარეობს და ისტორიულად, სხვადასხვა გეოპოლიტიკურ გამოწვევასა და სირთულესთან უწევდა გამკლავება. დღეს კი ჩვენ გვაქვს ამბიცია და ხედვა, რომ ეს მოცემულობა შესაძლებლობად ვაქციოთ და ჩვენი ქვეყანა, უსაფრთხო და მდგრადი ციფრული სერვისების რეგიონულ ჰაბად ვაქციოთ" - აღნიშნა მან.
სესიის ფარგლებში, ეკატერინე იმედაძემ ციფრულ ეკოსისტემაში ჩართულ მხარეებს შორის თანამშრომლობის მნიშვნელობაზეც ისაუბრა და ამ პროცესში, მარეგულირებელი ორგანოების როლს ხაზი გაუსვა: „როგორც მოგეხსენებათ, საქართველომ რამდენიმე თვის წინ ევროკავშირის წევრობის კანდიდატის სტატუსი მიიღო, რაც ახალ, უფრო ფართო ვალდებულებებს გვაკისრებს ჩვენი კანონმდებლობის, სტანდარტების თუ პრაქტიკის ევროკავშირის პოლიტიკასთან ჰარმონიზაციის თვალსაზრისით, თუმცა, ამავდროულად, კიდევ უფრო მეტ შესაძლებლობას გვაძლევს. ევროპულ ორგანიზაციებსა და საერთაშორისო პლატფორმებთან თანამშრომლობა, გვთავაზობს სახელმძღვანელო ჩარჩოს, რომელიც მოქნილი, მდგრადი და უსაფრთხო ციფრული ეკოსისტემის ჩამოყალიბებაში დაგვეხმარება." - განაცხადა კომისიის წევრმა და აღნიშნა, რომ ჰარმონიზაციის პროცესში, მნიშვნელოვანია ქვეყნის კონტექსტისა და არსებული ბაზრის მოცემულობის გათვალისწინებაც.
თემატურ სესიაში, ეკატერინე იმედაძესთან ერთად, მონაწილეობას ევროკავშირის კიბერუსაფრთხოების სააგენტოს (ENISA), ინტერპოლის, Google-სა და Etisalat-ის (E&) წარმომადგენლები იღებდნენ და ისეთ საკითხებს განიხილავდნენ, როგორებიცაა: ტექნოლოგიურ ერაში კიბერუსაფრთხოების უპრეცედენტო შესაძლებლობები და გამოწვევები, ასევე, უსაფრთხო ეკოსისტემის შექმნის, ფრაგმენტაციის თავიდან აცილების და ღიაობის თუ თავსებადობის შესანარჩუნებლად, სხვადასხვა რეგიონული თუ სექტორული ორგანიზაციების თანამშრომლობა.
კონგრესის ფარგლებში, ასევე დაგეგმილია ორმხრივი შეხვედრები, სადაც ეკატერინე იმედაძესთან ერთად, მონაწილეობას ComCom-ის წარმომადგენლები მიიღებენ და მონაწილე ორგანიზაციებთან ერთობლივ ინიციატივებსა და თანამშრომლობის გაღრმავების შესაძლებლობებს განიხილავენ.
შეგახსენებთ, რომ მობილური ტექნოლოგიის მსოფლიო კონგრესი ყოველწლიურად, გლობალური მობილური საკომუნიკაციო სისტემების ასოციაციის (GSMA) ორგანიზებით იმართება და მობილურ ბაზარზე არსებული ტენდენციების, სიახლეებისა თუ ინოვაციების გაცნობას და საუკეთესო პრაქტიკის გაზიარებას ემსახურება.
უახლესი
