თბილისის მერი კახა კალაძე მიიჩნევს, რომ გუშინ, რუსეთში განვითარებულ მოვლენებთან დაკავშირებით უსაფრთხოების საბჭოს მოწვევის არანაირი საჭიროება არ არსებობდა. ამის შესახებ კალაძემ ჟურნალისტებს პრეზიდენტის იმ განცხადების კომენტირებისას განუცხადა, რომლითაც სალომე ზურაბიშვილმა პრემიერ-მინისტრს უსაფრთხოების საბჭოს მოწვევისკენ მოუწოდა.
„ამის არანაირი საჭიროება არ არსებობდა. როდესაც რაღაც განსაკუთრებული ხდება და იქმნება საჭიროება უშიშროების საბჭოს მოწვევის, ეს გადაწყვეტილება იქნება მიღებული და პრეზიდენტისთვისაც გახდება ცნობილი. ერთი რამ უნდა გავითვალისწინოთ, რომ საქართველო არ არის საპრეზიდენტო რესპუბლიკა, საპარლამენტო რესპუბლიკაა. ეს ძალიან მნიშვნელოვანი კომპონენტია. პრეზიდენტის უფლებამოსილებაც ვიცით, თუ როგორ არის განაწილებული“, - განაცხადა კახა კალაძემ.
რაც შეეხება საზღვრების კონტროლს, როგორც თბილისის მერმა აღინშნა, ყველა შესაბამისი სამსახური მოწოდების სიმაღლეზეა.
„რაც შეეხება საზღვრების კონტროლს, არსებობს შესაბამისი სამსახურები. გუშინ შსს-მ გააკეთა განცხადება, სადაც ყველაფერი იყო ნათქვამი. შესაბამისად, ყველა სამსახური, რომელსაც ევალება აღნიშნული მიმართულების კონტროლი, ზედამხედველობა, არის მოწოდების სიმაღლეზე. თუ რაიმე საფრთხე იქნება, გადადგმული იქნება შესაბამისი ნაბიჯები, რომელიც, პირველ რიგში, ქვეყნის ინტერესებში იქნება“, - აღნიშნა კახა კალაძემ.
კახა კალაძის თქმით, ქვეყნის შესაბამისი სამსახურები გადაწყვეტილებებს იღებენ არა ემოციების კარნახით, არამედ უტყუარ ინფორმაციაზე დაყრდნობით.
„დავიწყოთ იმით, რომ ბევრი „ფეიკი“ და არასწორი ინფორმაცია ვრცელდებოდა. აქედან გამომდინარე, ზედმეტი აჟიოტაჟის შექმნა არასწორია. მერწმუნეთ, რომ ჩვენს შესაბამის სამსახურებს გაცილებით მეტი ინფორმაცია აქვთ, ვიდრე თქვენ, მე და ნებისმიერ მოქალაქეს. შესაბამისად, როდესაც ხდება უშიშროების საბჭოს მოწვევა ან ნებისმიერი მნიშვნელოვანი გადაწყვეტილების მიღება, ეს რა თქმა უნდა, ხდება კონკრეტულ ინფორმაციებზე დაყრდნობით, რომელიც არის უტყუარი. კეთდება სწორი ანალიზი და ამის შემდეგ იდგმება კონკრეტული ნაბიჯები. ამიტომ, არასწორია, შემოვიფარგლოთ სოცმედიაში და ზოგადად, მედიაში გავრცელებული ინფორმაციით, როდესაც გაუგებარია, ვის რა ინტერესი აქვს და ვინ რა ინტერესით აშუქებს სხვადასხვა საკითხს. არ უნდა ავყვეთ ემოციებს. თუ ჩვენს წარსულს და უახლეს ისტორიას გადავხედავთ, ემოციებით მიღებული გადაწყვეტილებები ძალიან ბევრი გვაქვს სამწუხაროდ და ამ გადაწყვეტილებებმა ათეული წლობით დახია ჩვენი ქვეყანა უკან. ამიტომ არ გვჭირდება ემოციები, გვჭირდება ცივი გონება, მსჯელობა, სწორი ანალიზის გაკეთება და შემდეგ გადაწყვეტილებების მიღება“, - განაცხადა კახა კალაძემ.
უახლესი
1 დღის წინ
დედაქალაქში „საახალწლო სოფელი“ გაიხსნა
