საქართველოსა და რუსეთს შორის პირდაპირი ავიარეისების დაწყება რამდენიმე ავიაკომპანიას სურს.
როგორც საქართველოს სამოქალაქო ავიაციის სააგენტოს (GCAA) განცხადებაშია აღნიშნული, საქართველოსა და რუსეთს შორის რეგულარული საჰაერო მიმოსვლის განხორციელების მოთხოვნით დღეის მდგომარეობით საქართველოს სამოქალაქო ავიაციის სააგენტოში შესულია რამდენიმე ავიაკომპანიის განაცხადი.
„საქართველოს მტკიცე პოზიციაა, რომ საქართველოსა და რუსეთის ფედერაციას შორის ფრენები შესრულდება მხოლოდ იმ ავიაკომპანიების მიერ და იმ საჰაერო ხომალდებით, რომლებიც არ არიან სანქცირებულნი. შესაბამისად, სამოქალაქო ავიაციის სააგენტოში შემოსული ყველა განაცხადი, ავიაკომპანიების მიერ წარმოდგენილი ინფორმაცია თუ დოკუმენტაცია იქნება დეტალური შესწავლის და სხვადასხვა მექანიზმებით გადამოწმების საგანი სანქციებთან მიმართებაში.
ამასთან სამოქალაქო ავიაციის სააგენტოს ახორციელებს იმ სახელწიფოებთან კონსულტაციებს და მათი მაგალითების შესწავლას, რომლებიც იცავენ სანქციებს და ამავე დროს, აქვთ პირდაპირი ავიამიმოსვლა რუსეთის ფედერაციასთან.
გაცნობებთ, რომ დღეის მდგომარეობით საქართველოს სამოქალაქო ავიაციის სააგენტოში შემოსულია რამდენიმე ავიაკომპანიის განაცხადი საქართველოსა და რუსეთს შორის რეგულარული საჰაერო მიმოსვლის განხორციელების მოთხოვნით.
ხაზგასმით ვაცხადებთ, რომ სამოქალაქო ავიაციის სააგენტოში წარმოდგენილ თითოეულ მომართვასთან დაკავშირებით, გადაწყვეტილება მიღებული იქნება მას შემდეგ, რაც დეტალურად იქნება შესწავლილი ავიაკომპანიების თუ მათი საჰაერო ხომალდების არსებული სტატუსი საერთაშორისო სანქციებთან თუ შეზღუდვებთან მიმართებაში და ფრენის ნებართვები ზემოთ აღნიშნული პრინციპით იქნება გაცემული“, - განმარტავენ სააგენტოში.
შეგახსენებთ, რომ დღეიდან რუსეთის პრეზიდენტის გადაწყვეტილებით, დღეიდან მის მიერვე დაწესებული ავიაემბარგო იხსნება და საქართველოსა და რუსეთს შორის პირდაპირი ავიარეისების ორგანიზება ხდება შესაძლებელი.
თუმცა უკრაინაში ომის გამო რუსეთისთვის დაწესებული სანქციების ფონზე, რუსულ ავიაკომპანიებს ნებიერი ხომალდით საქართველოში ფრენის უფლება არ ექნებათ.
უახლესი
