რომელ იშვიათი სახეობის ფრინველებზეა მოთხოვნა საქართველოში და რას სთავაზობს „ფერმა სენაკში“ მომხმარებელს

სენაკში მდებარე მეფრინველეობის ფერმის „ფერმა სენაკში“ დამფუძნებელი, მურმან გვასალია Business Insider Georgia-სთან ამბობს რომ ადგილობრივ ბაზარზე იშვიათი დეკორატიული სახეობის ფრინველებზე მოთხოვნა იზრდება.

„ამ დროისათვის, სენაკში 500 კვ.მ-ზე მდებარე ფერმაში მოვაშენე 10 სხვადასხვა სახეობის ქათამი, 3 სახეობის ფარშევანგი, 3 სახეობის ინდაური, იხვები, ციცრები და ბატები. ჯამში 100 ფრთა მყავს“, - ამბობს მურმან გვასალია.

მისი თქმით, ადგილობრივ ბაზაზე ყველაზე დიდი მოთხოვნაა ფარშევანგებზე. ამ ფრინველს ძირითადად საჩუქრად ყიდულობენ.

„ფარშევანგების მოშენება გასულ წელს დავიწყე. კვერცხი იყიდება როგორც ადგილობრივ ბაზარზე, ისე ხდება იმპორტი თურქეთიდან. კვერცხის ფასი სახეობის მიხედვით 60-დან 100-ლარამდეა. წელს 25 ფარშევანგი გამოიჩეკა. ძირითადად ვყიდი მამლებს სამი თვის ასაკიდან. მოთხოვნა იმდენად დიდია, რომ უკვე რეალიზებაც მოვახდინე“,- განაცხადა მურმან გვასალიამ.

მისი ინფორმაციით, სამი თვის ფარშევანგის ფასი ადგილობრივ ბაზარზე 350 ლარიდან იწყება. „საქართველოში ყველაზე მეტად გავრცელებულია ინდური ფარშევანგის სახეობა. სწორედ ეს ღირს 350 ლარი. კობალტის სახეობის 3 თვის ასაკის ფარშევანგის ფასი 500 ლარია, ხოლო ალბინოსი ორჯერ უფრო მეტი ღირს ვიდრე ინდური. რადგან ამ სახეობის ფარშევანგი მსოფლიოში და ადგილობრივ ბაზარზეც იშვიათობას წარმოადგენს“, - ამბობს „ფერმა სენაკში“-ს დამფუძნებელი.

რაც შეეხება სამომავლო გეგმებს, „ფერმა სენაკში“ გაფართოებას გეგმავს, რადგან იშვიათი სახეობის ფრინველებზე მოთხოვნა მზარდია. ასევე ფერმის გეგმებშია კონტაქტური ზოოპარკის შექმნა.

ფერმა სენაკში“ 4 წელია ადგილობრივ ბაზარზე ოპერირებს.