რატომ გაიზარდა საერთაშორისო ტრანსპორტირების ღირებულება - ლოგისტიკური კომპანია Metro Logistics-ის შეფასება

საერთაშორისო ლოგისტიკური კომპანია Metro Logistics-ი საერთაშორისო გადაზიდვების ტარიფების არამდგრადობას გლობალურ პოლიტიკურ კრიზისთან ერთად, ზამთარში მეტეოროლოგიური პირობების გაუარესებითაც ხსნის. 

როგორც Business Insider Georgia-სთან Metro Logistics-ის დამფუძნებელმა და დირექტორმა თემურ გუმბერიძემ განაცხადა, უამინდობის გამო ხდება მარშრუტების „გაჭედვა“. 

„ამ პერიოდში მსოფლიო გეოპოლიტიკურ არსებულ პოლიტიკურ კრიზისს ემატება ამინდის გაუარესება. პირობითად თუ სუეცის არხის ჩაკეტვის გამო ჩინეთი-ევროპის დამაკავშირებელი გზა არის ხმელეთი, ანუ ტრაილერებით ხდება გადაზიდვა, ამინდის გაუარესებამ კი ამ მარშრუტის „გაჭედვა“ გამოიწვია და თავისთავად მოხდა გადაზიდვების გაძვირებაც. იმიტომ, რომ უამინდობის გამო სატვირთო ავტომობილებს და მის მძღოლებს დიდი ხნის განმავლობაში უწევთ რიგში დგომა, შედეგად, კიდევ დამატებითი ხარჯები ეწერებათ კლიენტებს და საბოლოო ჯამში გადაზიდვის ტარიფიც იზრდება. 

ამას ემატება ისიც, რომ კონტეინერების ქირის საფასური, საზღვაო თუ სარკინიგზო გადაზიდვის დროს, საკმაოდაა გაზრდილი და ესეც მოქმედებს ფასების მერყეობაზე“, - აცხადებს თემურ გუმბერიძე.

Metro Logistics-ის დამფუძნებლისა და დირექტორის თქმით, დღეს ბაზარზე გადაზიდვების ფასები არის მერყევი, რაც ამ სერვისით მოსარგებლე ბიზნესსაც გარკვეულ პრობლემებს უქმნის. 

„რეალურად დღეს გვაქვს მოცემულობა, რომ ფასები მუდმივად მზარდი არაა და რეალურად მერყეობს. შესაძლოა, უცებ ავარდეს და უცებ ჩამოვარდეს და ეს ქმნის სწორედ არასტაბილურ ბაზარს, როდესაც კლიენტმა იცის, რომ ფასი მზარდია შესაძლოა, მან „სტოკი“ შექმნას და დაარეგულიროს საკუთარი ბიზნესი.

პირობითად, საშუალო ფასის დროს შემოიტანოს მეტი პროდუქცია, ვიდრე ამ დროს არსებული მოთხოვნაა. როდესაც ფასები მერყეობს ბიზნესი ვეღარ პროგნოზირებს, „სტოკი“ შექმნას, თუ დამოკიდებული იყოს შეკვეთებზე. ამის გამო ეს მერყეობა პირდაპირ აისახება ფასებზე, შესაძლოა, დღეს ჩინეთიდან საქართველომდე სარკინიგზო ტრანსპორტით ტვირთის გადმოზიდვაზე გადაიხადოს 8 000 დოლარი, მაგრამ ხვალ გადაიხადოს 6 000 დოლარი, ან ზეგ გადაიხადოს 10 000 დოლარი“, - განმარტავს  Metro Logistics-ის დამფუძნებელი და დირექტორი.

მისივე თქმით, სწორ ბიზნეს-მოდელში პროდუქტის ფასში ტრანსპორტირების ხარჯები 15%-ს არ უნდა აჭარბებდეს, რაც უმეტეს შემთხვევაში, რეალობაში, სხვაგვარად ხდება. 

„როგორც ეკონომისტები ამბობენ, სწორ ბიზნეს მოდელში პროდუქციის მთლიან ღირებულებაში ტრანსპორტირების ხარჯები არ უნდა გასცდეს 10-15%-ს.  თუმცა ჩვენი რეალობა განსხვავებულია, რადგანაც შეიძლება გვყავდეს კლიენტი, რომელიც პროდუქტში იხდის 10 000 დოლარს, ხოლო ტრანსპორტირებაში იხდის 9 000 დოლარს. შესაბამისად, ესეც პროდუქტების მიხედვით კლასიფიცირდება. სწორი ბიზნეს მოდელი, სადაც ტრანსპორტირების ხარჯი 10-15%-ს არ უნდა ასცდეს მთლიანობაში იშვიათად არსებობს.

თუმცა, მხოლოდ ჩვენს რეალობაში არა. მაგალითად ჩინეთიდან საქართველოში ტრანსპორტირება 1-1,5 წლის უკან ღირდა 2000 დოლარი და ახლა ღირს 7000 დოლარი. საუბარი მაქვს საზღვაო და სარკინიგზო გადმოზიდვების ფასებზე, რადგანაც საჰაერო გადმოზიდვების კუთხით დიდი ცვლილებები არ არის. თუმცა საჰაერო გადაზიდვების წილი ზოგადად ლოგისტიკაში მცირეა. მსოფლიოში ტვირთების 80%-ი გადაადგილდება საზღვაო ტრანსპორტით. შესაბამისად ფონს მაინც საზღვაო, სარკინიგზო, სახმელეთო გადაზიდვები ქმნიან“, - აცხადებს თემურ გუმბერიძე.

„მცირედით მოიმატა საერთაშორისო ტრანსპორტირების ღირებულებამაც. ამ ტენდენციების შენარჩუნების შემთხვევაში, საერთაშორისო ბაზრებზე გაზრდილი ფასები ადგილობრივი ბაზრის ფასებსაც გადმოეცემა და ინფლაციური მოლოდინების გაუარესების საფრთხეს წარმოშობს“, - აღნიშნულია სებ-ის მიერ დღეს გავრცელებულ პრესრელიზში, რომლის მიხედვითაც საქართველოს ეროვნული ბანკის მონეტარული პოლიტიკის კომიტეტმა 2024 წლის 18 დეკემბრის სხდომაზე მონეტარული პოლიტიკის განაკვეთის (რეფინანსირების განაკვეთი) უცვლელად დატოვების გადაწყვეტილება მიიღო. მონეტარული პოლიტიკის განაკვეთი 8 პროცენტს შეადგენს.