რა სიახლეებს სთავაზობს „ფაფანაკი“ მომხმარებლებს

„ფაფანაკი”, რომელიც ქართულ მოტივებზე შექმნილ სამოსს კერავს, სტანდარტული საქორწინო კაბების ხაზის დამატებას აპირებს.

როგორც Business Insider Georgia-ს ბრენდის დამფუძნებელმა ნინო ჭყონიამ განუცხადა, საქორწინო კაბების ხაზის დამატება, მომხმარებლის მოთხოვნიდან გამომდინარე მიიღეს.

„ჩვენ ვკერავთ საქორწინო კაბებს ტრადიციული ელემენტებით, თუმცა მომხმარებელი მუდმივად ითხოვს სტანდარტულ კაბებსაც. ამიტომ გადავწყვიტეთ ეს მიმართულება განვავითაროთ“, - ამბობს ნინო ჭყონია.

ამ დროისთვის ბრენდ „ფაფანაკის“ ქვეშ იწარმოება სასცენო, კლასიკური სამოსი, გათანამედროვებული ეროვნული და ბავშვის სამოსი.

„მოთხოვნა ჩვენს პროდუქციაზე წლიდან-წლამდე იზრდება.  ყველა ხაზზე არის მოთხოვნა, თუმცა ყველაზე კარგად გათანამედროვებული ქართული სამოსი იყიდება. ფასები 50-ლარიდან 3 ათას ლარამდეა ხარისხის შესაბამისად.

ჩვენი ნაწარმი იყიდება მსოფლიოს რამდენიმე ქვეყანაში, მათ შორის აშშ-ში, ნიუ-იორკის მაღაზიაში, სადაც ცნობილი ქართული ბრენდებია წარმოდგენილი“, - ამბობს მეწარმე.

„ფაფანაკი“ თბილისში ფლობს სამკერვალოს და მაღაზიას ფალიაშვილის ქუჩაზე. კომპანია 30-მდე ადამიანს ასაქმებს.