რა სატარიფო პოლიტიკა დაუწესა აშშ-მ საქართველოს და რეგიონის სხვა ქვეყნებს

აშშ-ის პრეზიდენტმა დონალდ ტრამპმა ყოვლისმომცველი ტარიფების დაწესების შესახებ განაცხადა, რაც ნებისმიერი ქვეყნისთვის აშშ-ში იმპორტზე მინიმუმ 10%-იანი ტარიფის დაწესებას ითვალისწინებს. გამოქვეყნებული ინფორმაციის მიხედვით, საქართველოსთვის დაწესებულია 10%-იანი ტარიფი. ასევე მინიმალური, 10%-იანი ტარიფებია რეგიონის სხვა ქვეყნებისთვისაც: სომხეთისთვის და აზერბაიჯანისთვის. ასევე 10%-იანი ტარიფია დაწესებული თურქეთისთვის. 

ყველაზე მაღალი, 50%-მდე ტარიფები დაუწესა ტრამპმა ​ლაოსს, მადაგასკარს, კამბოჯას, მიანმარს. უფრო კონკრეტულად: კამბოჯა 49%, შრილანკა - 44%, მადაგასკარი - 47%, მიანმარი - 44%, ლაოსი - 48%, სირია - 41% და სენტ პიერი და მიკელონი - 50%.

20%-იანი ტარიფი დაუწესდა ევროკავშირს.

10%-იანი უნივერსალური ტარიფი 5 აპრილიდან ამოქმედდება, საპასუხო ტარიფები კი 9 აპრილიდან.

აშშ-ის პრეზიდენტის, დონალდ ტრამპის მიერ დაწესებულ ტარიფებს მსოფლიო ლიდერები ეხმიანებიან და აკრიტიკებენ.

ისინი თეთრის სახლის ლიდერის გადაწყვეტილებას გაუმართლებლად მიიჩნევენ და აცხადებენ, რომ ადეკვატურ ზომებს მიიღებენ.

„გამოცხადებულ ტარიფებს საპასუხო ზომებით შევეწინააღმდეგებით. მნიშვნელოვანია ვიმოქმედოთ მიზანმიმართულად. და ეს არის ის, რასაც ჩვენ გავაკეთებთ“, - თქვა კანადის პრემიერ-მინისტრმა, მარკ კარნიმ.

„ტარიფების დაწესება არასწორია, რადგანაც ამან, შესაძლოა, სავაჭრო ომი გამოიწვიოს. ჩვენ ყველაფერს ვაკეთებთ, რომ ვიმუშაოთ შეერთებულ შტატებთან შეთანხმების მისაღწევად, რათა თავიდან ავიცილოთ სავაჭრო ომი, რომელიც აუცილებლად დაასუსტებს დასავლეთს სხვა გლობალური აქტორების სასარგებლოდ“, - აღნიშნა იტალიის პრემიერ-მინისტრმა, ჯორჯია მელონიმ.

„ტარიფებს არანაირი ლოგიკა არ აქვთ და ეწინააღმდეგება ჩვენი ორი ერის პარტნიორობის საფუძვლებს. ეს არ არის მეგობრის ქმედება“, - თქვა ავსტრალიის პრემიერ-მინისტრმა, ენტონი ალბანიზმა.

ცნობისთვის, ტრამპმა გუშინ მსოფლიოს უმეტეს ქვეყანას საქონლის იმპორტზე ტარიფი დაუწესა.