თბილისის საკრებულოში გამართულ სხდომაზე, რომელზეც დედაქალაქის მერმა კახა კალაძემ ბიუჯეტი დასამტკიცებლად წარადგინა, სპორტისა და ახალგაზრდულ საქმეთა კომისიის თავმჯდომარემ, გურამ ოქროპირიძემ, მიმდინარე წელს განხორციელებულ მნიშვნელოვან პროექტებზე ისაუბრა.
„წელს, ისევე როგორც უკანასკნელი წლების განმავლობაში, სპორტისა და ახალგაზრდობის მიმართულებით ბევრი მასშტაბური ინფრასტრუქტურული პროექტი განხორციელდა, მათ შორის აღსანიშნავია მრავალფუნქციური ცენტრების კონცეფცია, რაც სიახლეა ჩვენს ქვეყანაში, ასევე ის ასობით სტადიონი, რომელთა მშენებლობა-რეაბილიტაციაც განხორციელდა.
ძალიან მნიშვნელოვანია პროგრამები, რომლებიც ახალგაზრდებს ეხმარება, ერთი მხრივ, განათლების მიღებაში და მეორე მხრივ, იმ სოციალური საჭიროებების უზრუნველყოფაში, რომლებიც დღეს გვაქვს. ერთ-ერთი ასეთი გამორჩეული პროექტია „ისწავლე და დასაქმდი“, რომლის ფარგლებშიც ძალიან მაღალია დასაქმების მაჩვენებელი პროფესიული კურსების გავლის შემდეგ. საბოლოო ჯამში ბევრი რეფორმა და პროექტი განხორციელდა, რომელთაც კომპლექსური გადაწყვეტილებების მიღება სჭირდებოდა. დღეს მათ შედეგებს თითოეული ჩვენგანი ვხედავთ და მინდა ამისთვის მადლობა გადავუხადო დედაქალაქის მერს და ქალაქის მთავრობის თითოეულ წევრს“, - განაცხადა გურამ ოქროპირიძემ.
დღესვე საკრებულოს წევრმა „მწვრთნელთა მხარდაჭერის“ პროგრამის შესახებაც ისაუბრა და აღნიშნა, რომ სასურველი იქნება, შესაძლებლობების ფარგლებში, შემდეგი წლის ბიუჯეტში განხილული იქნას პროგრამაში ჩართულ მწვრთნელთა ხელფასების 10%-იანი ზრდა, რაზეც დედაქალაქის მერისგან თანხმობა მიიღო.
უახლესი
