ოქროს სერტიფიკატი ერთ-ერთი ყველაზე ლიკვიდურია და ლოგიკურად მოთხოვნადი იქნება, - ასე აფასებს საბანკო ასოციაციის პრეზიდენტი ალექსანდრე ძნელაძე სებ-ის მიერ ოქროს სერტიფიკატების გამოშვებასა და ოქროს ზოდების გაყიდვის დაწყებას. როგორ ძნელაძემ აღნიშნული ინიციატივა კიდევ ერთი ნაბიჯია ფასიანი ქაღალდების ბაზრის განვითარებისთვის.
„როგორც იცით ოქროს სერტიფიკატს ობლიგაციის სახე აქვს და ასევე სებ-მა დაიწყო ოქროს ზოდების გაყიდვა. ფასიანი ქაღალდების ბაზარზე საკმაოდ მაღალ ლიკვიდური ობლიგაციები იქნება ეს და მეორედი ბაზრის განვითარებასაც იმედია, რომ ხელს შეუწყობს. რეალურად სხვა მიმართულებით, დღეის მდგომარეობით გამიჭირდება შეფასება, რადგანაც უნდა შევხედოთ რამდენად მოთხოვნადი იქნება აღნიშნული ოქროს სერტიფიკატები ბაზარზე“, - განმარტავს ალექსანდრე ძნელაძე.
საბანკო ასოციაციის პრეზიდენტის თქმით, გრძელვადიან პერსპექტივაში გამოჩნდება, აღნიშნული მხოლოდ ინვესტირების ნაწილი იქნება თუ მეორადი ბაზრის განვითარებასაც შეუწყობს ხელს.
„ოქროს სერტიფიკატი ერთ-ერთი ყველაზე ლიკვიდურია და ლოგიკურად მოთხოვნადი იქნება. მაგრამ გააჩნია რა ლიკვიდურობაა რეალურად იმ ნაწილში, ვისაც ამ თანხების დაბანდება უნდა. დღევანდელი გადმოსახედიდან ამის შეფასება რთულია. რამდენიმე თვე იქნება საჭირო, რათა შევხედოთ თუ რა აქტიურობა იქნება. ერთადერთი თავიდან შეიძლება რეალიზაცია საკმაოდ აქტიურად მოხდეს, მაგრამ ეს მხოლოდ გრძელვადიანი ინვესტიციის ნაწილი იქნება, თუ მეორადი ბაზრის განვითარებასაც შეუწყობს ხელს ეს ცოტა გრძელვადიან ჭრილში გამოჩნდება“, - აცხადებს ალექსანდრე ძნელაძე.
შეგახსენებთ, რომ დღეიდან ოქროს სერტიფიკატების გამოშვებასა და ოქროს ზოდების გაყიდვას დაიწყო.
როგორც სებ-ში განმარტავენ, ბოლო პერიოდში, მსოფლიოს ბევრ ქვეყანაში მომატებული ინფლაციისა და გაზრდილი გეოპოლიტიკური რისკების ფონზე, ოქროზე მოთხოვნა მნიშვნელოვნად გაზრდილია. ოქროში ინვესტირება ერთ-ერთი საუკეთესო საინვესტიციო საშუალებაა, რომელიც მაღალი ლიკვიდურობით ხასიათდება და მოთხოვნა მუდმივად არსებობს. ოქრო დანაზოგების დივერსიფიკაციის კარგი საშუალებაცაა, ვინაიდან მასზე მოთხოვნა სწორედ მაშინ იზრდება, როდესაც სხვა ტიპის ინვესტიციები უფრო რისკიანი ხდება.
ოქროს სერტიფიკატი ოქროთი უზრუნველყოფილი უპროცენტო ფასიანი ქაღალდია, რომელიც ელექტრონული ფორმით არსებობს. ის გამყარებულია სერტიფიკატის ნომინალის იდენტური წონის ოქროს ზოდებით, რომელიც ეროვნული ბანკის საცავში ინახება. უმაღლესი სინჯის ზოდები სრულ შესაბამისობაშია საერთაშორისო სტანდარტებთან.
სერტიფიკატის მფლობელს რამდენიმე უპირატესობა აქვს - მას შეუძლია სერტიფიკატის როგორც მეორად ბაზარზე გაყიდვა, ასევე მისი განაღდება და ეროვნული ბანკის საცავიდან კუთვნილი ოქროს ზოდის მიღება. ოქროს სერტიფიკატების შეძენას მომხმარებლები კომერციულ ბანკებში შეძლებენ.
ამასთან, აღსანიშნავია, რომ ოქროს სერტიფიკატის ფასი ოქროს საერთაშორისო ფასის ცვლილების შესაბამისად შეიცვლება/დადგინდება.
ოქროს სერტიფიკატებიც და ზოდებიც 20 გრამიანი და 1 კგ-იანი ნომინალის იქნება. 20 გრამიანი ნომინალის ოქროს ზოდის შეძენა ეროვნული ბანკის ინტერნეტ მაღაზიიდანაც იქნება შესაძლებელი. საიტზე მომხმარებელი დეტალურად გაეცნობა ზოდების შესახებ ინფორმაციას და ფასს, რომლის დადგენაც ყოველდღიურად, ლონდონის ძვირფასი ლითონების ბაზრის ასოციაციის ვებ-გვერდზე (LBMA) დაფიქსირებული ფასით და ეროვნული ბანკის მიერ ლარის მიმართ აშშ დოლარის გაცვლის ოფიციალური კურსის მიხედვით მოხდება. 1 კგ-იანი ნომინალის ოქროს ზოდის შეძენა კი საქართველოს ეროვნული ბანკის საკასო ცენტრიდან იქნება შესაძლებელი (ორშაბათი-პარასკევი 10:00-13:00 სთ; 14:00-17:00 სთ).
სებ-ი დიდი ბრიტანეთის სამეფო ზარაფხანის, The Royal Mint-ის მიერ დამზადებულ, მაღალი სინჯის (AU 999,9)ოქროს ზოდებს გამოუშვებს გაყიდვაში. The Royal Mint მსოფლიოს წამყვანი და მრავალწლიანი ისტორიის მქონე ზარაფხანაა, რომელიც ყოველწლიურად 60 ქვეყნისთვის ამზადებს პროდუქციას.
ოქროს სერტიფიკატებისა და ოქროს ზოდების გაყიდვა 4 დეკემბრიდან დაიწყო.
მიმდინარე წელს საერთაშორისო ბაზრებზე ოქროზე მოთხოვნა გაიზარდა. ანალიტიკოსთა პროგნოზით, 2024 წელს უნცია ოქროს ფასი 2 000 დოლარის ნიშნულთან შენარჩუნდება, 2025 წლისთვის კი 2 500 დოლარამდე გაიზრდება.
