კომპანია „ელთ ბილდინგის“ დამფუძნებელი ელგუჯა თურმანიძე Business Insider Georgia-სთან აცხადებს, რომ შემდგომ დეველოპერულ პროექტებში ჰელიო სისტემების გამოყენებას გეგმავენ.
„ჰელიო სისტემების გამოყენებას ვგეგმავთ ჩვენს შემდგომ პროექტში. გავახმოვანებ მხოლოდ „ეიჟენ გარდენს“, რომელიც არის ჩვენი პარტნიორი ბრენდის მასშტაბური მიმართულება. სადაც ჩვენ საშუალება გვექნება განვახორციელოთ განახლებადი ენერგიის ჰელიო სისტემების პროექტი, სადაც გამომუშავებული ენერგიის 60%-ს ჩვენ მოვიხმართ, ხოლო დანარჩენის ქსელში გაშვება მოხდება“, - განაცხადა ელგუჯა თურმანიძემ.
მისი თქმით, ამ პროექტის განხორციელება აღმოსავლეთ საქართველოში იგეგმება.
„აქტიური მოლაპარაკებები მიმდინარეობს აღმოსავლეთ საქართველოში კერძოდ, კახეთში ჰელიო სისტემების პროექტზე.
ერთია ენერგიის გამომუშავება, მეორეა მისი შენახვა და გადაცემა შემდგომი მოხმარებისთვის. როგორც ქვეყნის შიგნით, ისე ქვეყნის გარეთ. შავი ზღვის კაბელის პროექტის დასრულების შემდეგ კიდევ უფრო მეტად მომხიბვლელი გახდება ეს სფერო.
ჩვენ ასევე ვგეგმავთ საკუთარ პროექტებში განახლებადი ენერგოსისტემების მოწყობას. ფაქტობრივად ეს უკვე დაგეგმილი გვაქვს და შემდგომ პროექტებში განხორციელდება“,- განაცხადა ელგუჯა თურმანიძემ.
მისი თქმით, „ელთ ბილდინგმა“ ბოლო 7 წლის განმავლობაში 10-ზე მეტი დეველოპერული პროექტი დაასრულა.
„სწორედ ამიტომ დავაფიქსირეთ ჩვენი მაღალი ინტერესი განახლებად ენერგიებთან დაკავშირებით. ყოველწლიურად რამდენიმე ათეულ მეგავატზე მოთხოვნას მხოლოდ ჩვენ ვაჩენთ და ორი წლის ჭრილში სამი მასშტაბური პროექტის პრეზენტაციას ვგეგმავთ“, -აღნიშნა ელგუჯა თურმანიძემ.
უახლესი
