გაზმომარაგების სექტორშიც კომპანიების გაყოფის პროცესი დაიწყება და განაწილებას და მიწოდებას სხვადასხვა ბიზნეს სუბიექტი მოახდენს - სემეკის თავმჯდომარე

გაზმომარაგების სექტორშიც, ისევე როგორც ელექტროენერგიის სექტორში რეფორმები დაწყებულია, - ამის შესახებ სემეკის თავმჯდომარემ დავით ნარმანიამ რადიო „სივრცის“ (FM 98.5) ეთერში, გადაცემა Business Insider Georgia-ში სტუმრობისას განაცხადა. მისი თქმით, უკვე შემუშავებულია მეორადი კანონმდებლობის ძირითადი ნაწილი.
„ახლა მიმდინარე წელს იქნება კომპანიების გაყოფის პროცესი, როგორც ელექტრო ენერგეტიკაში გაკეთდა განაწილება და მიწოდების საქმიანობა გაიყოფა ერთმანეთისგან. გარკვეული კონკურენციაც გაჩნდება, რითაც საბოლოო ჯამში მომხმარებლებმა უნდა ისარგებლონ და მიიღონ სარგებელი. აქედან გამომდინარე, რა თქმა უნდა ბუნებრივი გაზის სექტორში, ასევე მოქმედ ენერგეტიკულ ბირჟას დაემატება პლატფორმის კომპონენტი, სადაც გაზით ვაჭრობა იქნება. ესეც სიახლე იქნება გაზის მსხვილი მომხმარებლებისთვის. 
რაც შეეხება წყალმომარაგების სექტორს, წყალმომარაგების სექტორში მნიშვნელოვანი ამოცანები არის მეტი ინვესტიციის განხორციელება და კომპანიების საქმიანობის ეფექტიანობის გაუმჯობესება. ამ მიზნით ჩვენ ჯერ კიდევ 2023 წლის ბოლოს ჯივიპის არეალში შევითანხმეთ მნიშვნელოვნად გაზრდილი ინვესტიციები. ჯამში დაახლოებით 240 მლნ ლარი უნდა დახარჯოს ჯივიპიმ თბილისში, რუსთავში და მცხეთაში სამი წლის განმავლობაში წყალმომარაგების სისტემის გაუმჯობესებისთვის. გასული წელი ერთ-ერთი მნიშვნელოვანი იყო იმით, რომ წლების განმავლობაში დაგროვებული დიდი პრობლემა დედაქალაქში, იგივე გახოკიძის ქუჩაზე მთლიანად წყალმომარაგება კანალიზაციის სისტემის გამოცვლასთან დაკავშირებით უკვე დასრულდა. აღნიშნული პროექტი თითქმის ბოლომდე გავიდა.  22 მლნ ლარი დაიხარჯა მხოლოდ ამ ნაწილში. რუსთავში ძალიან ბევრი პრობლემა მაგისტრალურ წყალსადენებზე არსებულ ავარიებთან დაკავშირებით მოგვარდა და ახლაც მიმდინარეობს პროექტები, როგორიც არის მაგისტრალური წყალსადენების გამოცვლა, ასევე რუსთავს ჰქონდა მხოლოდ ერთი წყალმომარაგების სისტემა, სადაც ხშირი იყო ავარიები და ამ წყალმომარაგების  მთავარი მაგისტრალი 18 კმ-იანი მაგისტრალის, დაახლოებით ნახევარი გამოიცვალა და ახალი გაკეთდა, რაც ასევე ავარიებს შეამცირებს და საბოლოო ჯამში  ჩვენი ამოცანა არის რომ ნაბიჯ-ნაბიჯ შემცირდეს წყალმომარაგების სექტორში ავარიები და მომხმარებელი იყოს უფრო მეტად უზრუნველყოფილი და კმაყოფილი“, - განაცხადა ნარმანიამ.