ვაჭრობის ხელშეწყობის პროგრამის (TFP) ფარგლებში, ევროპის რეკონსტრუქციისა და განვითარების ბანკი (EBRD) თიბისი ბანკისთვის უზრუნველყოფს პირველ TFP ფაქტორინგის პროდუქტს ადგილობრივ ვალუტაში. ფაქტორინგი თიბისი ბანკს საშუალებას მისცემს გააფართოვოს შიდა ფაქტორინგის ბიზნესი ქვეყანაში არსებულ მცირე და საშუალო საწარმოებთან (SME). ეს არის პირველი შემთხვევა კავკასიის რეგიონში, როდესაც ამ ტიპის საშუალება ხელმისაწვდომი გახდა EBRD TFP პარტნიორი ბანკისთვის ადგილობრივ ვალუტაში. ამ პროდუქტით დაფინანსებული ტრანზაქციების მაგალითებია საკვებისა და საქონლის განაწილება, სატრანსპორტო მომსახურება და სამშენებლო მასალების წარმოება და ვაჭრობა.
თიბისი ბანკის კორპორაციული და საინვესტიციო ბანკინგის, დაგროვილი კაპიტალის აღმასრულებელი დირექტორის მოადგილემ გიორგი თხელიძემ განაცხადა: „ჩვენთვის, როგორც საქართველოში ბიზნესის წამყვანი მხარდამჭერისათვის, მნიშვნელოვანია განვითარების ახალი შესაძლებლობების უზრუნველყოფა პარტნიორი კომპანიებისთვის. EBRD-ის TFP ფაქტორინგის პროდუქტი ადგილობრივ ვალუტაში სწორედ ამგვარ შესაძლებლობაა. ფაქტორინგის საშუალებით ჩვენ მხარს ვუჭერთ საერთაშორისო ვაჭრობაში ჩართულ კომპანიებს ფინანსური რესურსების მართვის პროცესში. მიუხედავად იმისა, რომ პროდუქტი შედარებით ახალია საქართველოს საბანკო სექტორისთვის, ჩვენ ბაზარზე ლიდერის პოზიციას ვიკავებთ 68 პროცენტიანი წილით. ის ფაქტი, რომ TBC არის პირველი ბანკი რეგიონში, რომელმაც მიიღო TFP ფაქტორინგის პროდუქტი EBRD-ისგან ადგილობრივ ვალუტაში, ადასტურებს ჩვენს მოწინავე პოზიციას ფაქტორინგისა და ზოგადად ვაჭრობის დაფინანსების განვითარებაში და EBRD-ის ნდობას ჩვენს მიმართ.“
„მოხარული ვართ, რომ ფაქტორინგი კავკასიაში TFP პარტნიორი ბანკისთვის ადგილობრივ ვალუტაში იქნება ხელმისაწვდომი. TFP ფაქტორინგის ლიმიტი ადგილობრივ ვალუტაში საშუალებას აძლევს თიბისი ბანკს ხელი შეუწყოს შიდა ტრანზაქციებს და მხარი დაუჭიროს უფრო მეტ მცირე და საშუალო ბიზნესს საქართველოში,“ აღნიშნა ალკის ვრენიოს დრაკინოსმა, EBRD-ის რეგიონულმა დირექტორმა კავკასიაში.
თიბისი ბანკი EBRD-ის TFP-ს 1999 წელს შეუერთდა. მას შემდეგ თიბისი ბანკმა გამოიყენა TFP-ის მხარდაჭერა 1000-ზე მეტი სავაჭრო ტრანზაქციის დასაფინანსებლად, რომელთა საერთო ღირებულება 850 მილიონ ევროზე მეტია, მათ შორის იყო LED სანათების იმპორტი ბათუმში ქუჩების განათების ჩასანაცვლებლად და საქართველოდან სომხეთში მწვანე და ეკოლოგიურად სუფთა ავტობუსების ექსპორტი.
TFP ფაქტორინგის ლიმიტი ადგილობრივ ვალუტაში საშუალებას აძლევს თიბისი ბანკს ხელი შეუწყოს შიდა ტრანზაქციებს და უზრუნველყოს ფაქტორინგზე წვდომა საქართველოში არსებულ მეტ მცირე და საშუალო ბიზნესისთვის. TFP-ის მთავარი მიზანია მცირე და საშუალო ბიზნესის მხარდაჭერა. პროგრამა მიზნად ისახავს ხელი შეუწყოს საგარეო ვაჭრობას EBRD-ის რეგიონებიდან და მის შიგნით და უზრუნველყოფს სხვადასხვა პროდუქტს ამ ვაჭრობის გასაადვილებლად, გარანტიებისა და ვაჭრობასთან დაკავშირებული ფულადი ავანსების ჩათვლით. პროგრამა აძლიერებს ადგილობრივი ბანკების უნარს, უზრუნველყონ ვაჭრობის დაფინანსება და ამ ბანკების მეშვეობით მეწარმეებს ჩვენი რეგიონების მასშტაბით ეძლევათ მხარდაჭერა, რომელიც მათ სჭირდებათ იმპორტისა და ექსპორტის ვაჭრობაზე ხელმისაწვდომობის გაზრდის მიზნით.
EBRD-მა დღემდე 5 მილიარდ ევრომდე ინვესტიცია განახორციელა საქართველოში 290 პროექტის მეშვეობით, ამ ინვესტიციის 83 პროცენტზე მეტი კერძო სექტორშია. ბანკის ძირითადი საინვესტიციო სფეროები მოიცავს ფინანსურ სექტორს, კერძო სექტორს, მდგრად ინფრასტრუქტურას, წარმოებასა და სერვისებს.
უახლესი
