მიმდინარე წელს კვერცხის წარმოების თვალსაზრისით სტაბილური ვითარებაა, - ამის შესახებ Business Insider Georgia-ს ,,მეფრინველეობის განვითარების ასოციაციის“ თავმჯდომარე, კომპანია ,,კუმისის“ დამფუძნებელმა ზურაბ უჩუმბეგაშვილმა წარმოების 6 თვის შედეგების შეფასებისას განუცხადა.
„თუ არ ჩავთვლით მცირე რყევებს, ბოლო 6 თვის განმავლობაში ლარიც სტაბილურია. ფასებს ვინარჩუნებთ, არ იგეგმება პროდუქციის გაძვირება. რაც შეეხება წარმადობის ზრდას, მოსალოდნელია, რომ ზრდამ 3-4% შეადგინოს“, - ამბობს ზურაბ უჩუმბეგაშვილმა.
„კუმისი“ თვეში დაახლოებით 220-230 ათასს კვერცხს აწარმოებს. საბითუმო ფასი კატეგორიების მიხედვით 0.32-0.35 თეთრია. როგორც
„მეფრინველეობის განვითარების ასოციაციის“ თავმჯდომარე ამბობს, ადგილობრივ ბაზარზე ყველაზე მოთხოვნადი პირველი კატეგორიის კვერცხია.
„ჩვენ კვერცხზე საბითუმო ფასს არ ვცვლით, თუმცა შემდეგ პროდუქტს ემატება ტრანსპორტირებისა და სავაჭრო ქსელის მარჟა“, - ამბობს ზურაბ უჩუმბეგაშვილი. ,
,კუმისის“ დამფუძნებელი ამბობს, რომ სასურსათო კვერცხი მხოლოდ ადგილობრივ ბაზარზე იყიდება. ამ კუთხით, ევროკავშირის ბაზარზე შესვლა რთულია, ხოლო მეზობელი ქვეყნების - სომხეთისა და აზერბაიჯანის ბაზრები ჩაკეტილია. რაც შეეხება არასასურსათო კვერცხს, სანაშენე რეპროდუქციის კვერცხის მცირე რაოდენობა გადის სომხეთსა და აზერბაიჯანში.
