თევზის, ძაღლისა და კატის ნატურალური საკვები პროდუქტების ბრენდი TaoFood • ტაოფუდი, რომელიც დღეისათვის მხოლოდ ადგილობრივ ბაზარზე იყიდება, საექსპორტო ბაზრებზე გასასვლელად ემზადება. როგორც Business Insider Georgia-სთან TaoFood-ის დამფუძნებელმა მანანა მეტრეველმა განაცხადა, ამ დროისათვის აქტიური მოლაპარაკებებია არაბეთის გაერთიანებულ საამიროებთან და სომხეთთან.
„ექსპორტთან დაკავშირებით ვმუშაობთ, მაგრამ ჯერჯერობით საბოლოო შეთანხმება არ არის. მოლაპარაკებების ეტაპზე ვართ არაბეთის გაერთიანებულ საამიროებში და სომხეთში ექსპორტის დაწყებაზე. თუმცა ამ დროისათვის ფასების და ტრანსპორტირების ხარჯების კალკულაცია ხდება. თუმცა შესაძლოა მომავალ წელს უკვე ექსპორტიც დავიწყოთ“, - აცხადებს მანანა მეტრეველი.
ირკვევა, რომ წინა წელთან შედარებით TaoFood-ის გაყიდვები 15%-იან ზრდას აჩვენებს და ყველაზე მოთხოვნადი კომპანიის მიერ წარმოებულ პროდუქტებში მაინც ძაღლის საკვები პროდუქტებია, საუბარია ეკონომ კლასის შედარებით ბიუჯეტურ საკვებ პროდუქტებზე.
TaoFood-ი საკუთარ მაღაზია მხოლოდ დასავლეთ საქართველოში ფლობს, ხოლო აღმოსავლეთ საქართველოში რეალიზაციას ონლაინ პორტალებთან თანამშრომლობს.
კომპანია სამომავლოდ ფიზიკური მაღაზიის გახსნას განიხილავს თბილისშიც, რომელსაც ქსელური სახე ექნება.
„მაღაზიის გახსნას განვიხილავთ თბილისში, თუმცა აქამდე ისე გვინდა მივიდეთ, რომ ასორტიმენტიც შეესაბამებოდეს მაღაზიას. თუ საკუთარ მაღაზიას გახსნი, თბილისი მოთხოვნადი ბაზარია და ვინაიდან ჩვენს მიერ წარმოებული პროდუქცია არის ორგანული, ქსელი სადაც ეს პროდუქტი შევა უნდა იყოს მზად ამ პროდუქტის მიღებისთვის. ანუ TaoFood-ის პროდუქციას თავისი შენახვის პირობები აქვს“, - აცხადებს TaoFood-ის დამფუძნებელი.
TaoFood-ი, რომელიც ბაზარზე 2020 წლიდან ოპერირებს ასორტიმენტის გამრავალფეროვნებაზეცაქტიურად მუშაობს და 2025 წლის იანვარში ბაზარს ახალ პროდუქტსაც წარუდგენს.
„ვმუშაობთ ასორტიმენტის გამრავალფეროვნებაზე და საჯამრთელო ხაზის დანერგვაზე. საჯანმრთელო ხაზი არის სპეციალური მიმართულება, რომელიც შინაურ ცხოველს სხვადასხვა მიმართულებით ეხმარება, თუნდაც კუჭის მონელების მიმართულებით, ბეწვისთვის და ასე შემდეგ.
TaoFood-ი ბაზარს ახალ პროდუქტს იანვარში წარუდგენს და ეს იქნება სუპერ პრემიუმ კლასის პროდუქტი და იქნება გასტრო, ანუ კუჭ-ნაწლავის გამოსაჯანმრთელებელი. აღნიშნული პროდუქტი განკუთვნილი იქნება ძაღლებისთვის. ხოლო კატებისთვის სიახლეს შევთავაზებთ კასტრირებული კატების მიმართულებით“, - აცხადებს მანანა მეტრეველი.
დღეისათვის TaoFood-ი 10 დასახელების პროდუქტს აწარმოებს
ამ დროისათვის საწარმოო ხაზი 50%-იანი დატვირთვით მუშაობს და გაყიდვების ზრდის პარალელურად წარმოებაც გაიზრდება.
უახლესი
