საქართველოსა და სომხეთის საჰაერო ნავიგაციის უწყებებს შორის თანამშრომლობის მემორანდუმი გაფორმდა

საქაერონავიგაციის გენერალურმა დირექტორმა გოჩა მეზვრიშვილმა და სომხეთის საჰაერო ნავიგაციის სერვისის პროვაიდერი ორგანიზაციის Armats გენერალურმა დირექტორმა ვარდან ჩილინგარიანმა ხელი მოაწერეს მემორანდუმს ორმხრივი თანამშრომლობის შესახებ. ხელმოწერა საქართველოს ეკონომიკისა და მდგრადი განვითარების სამინისტროს შპს „საქაერონავიგაციის“ დელეგაციის სომხეთში სამუშაო ვიზიტის ფარგლებში გაიმართა.

მემორანდუმი მიზნად ისახავს რეგიონული საავიაციო კოორდინაციის გაუმჯობესებას, ავიამიმოსვლის მართვის თანამედროვე ტექნოლოგიების და გამოცდილების გაზიარებას.

„ჩვენთვის პრიორიტეტულია პარტნიორობა მეზობელ ქვეყნებთან, რათა უზრუნველვყოთ უსაფრთხო და ეფექტური საჰაერო სივრცე მთლიანად სამხრეთ კავკასიის რეგიონში. ჩვენ სომხეთის მხარესთან არაერთი მნიშვნელოვანი პროექტი განვახორციელეთ. მემორანდუმი მნიშვნელოვნად გააძლიერებს რეგიონულ თანამშრომლობას საერთაშორისო სტანდარტების შესაბამისად,” – აღნიშნა გოჩა მეზვრიშვილმა.

ვიზიტის ფარგლებში, საქაერონავიგაციის წარმომადგენლებმა სამუშაო შეხვედრები გამართეს სომხეთის საავიაციო სფეროს წარმომადგენლებთან, რომელთა მთავარი მიზანი იყო ორ ქვეყანას შორის თანამშრომლობის გაღრმავება საჰაერო ნავიგაციის და საავიაციო უსაფრთხოების სფეროში. ასევე დაესწრნენ ევროკონტროლის (EUROCONTROL) ორგანიზებით გამართულ რეგიონულ ვორქშოპს, რომელშიც მონაწილეობა მიიღეს საქართველოს, სომხეთის, თურქეთის და ბულგარეთის საჰაერო ნავიგაციის უწყებებმა. ღონისძიების მთავარი მიზანი იყო რეგიონში საჰაერო მოძრაობის მართვის სისტემების გაუმჯობესება, უსაფრთხოების სტანდარტების ამაღლება და თანამშრომლობის გაძლიერება.