ყველამ უნდა თქვას ხმამაღლა და მკაფიოდ, რომ წლის ბოლოს საქართველოს უნდა მიეცეს კანდიდატის სტატუსი - ირაკლი ღარიბაშვილი

ყველამ ამ ქვეყანაში, მმართველმა პარტიამ, ხელისუფლებამ, პრეზიდენტმაც, ოპოზიციამაც - ყველამ უნდა თქვას ხმამაღლა და მკაფიოდ, რომ წლის ბოლოს საქართველოს უნდა მიეცეს კანდიდატის სტატუსი, - ამის შესახებ პრემიერ-მინისტრმა, ირაკლი ღარიბაშვილმა ევროკავშირის უმაღლეს წარმომადგენელთან, ჟოზეფ ბორელთან ერთობლივ პრესკონფერენციაზე განაცხადა.

„ღიად ვესაუბრე ბატონ ბორელს და მის დელეგაციას და გადავეცი ჩვენი მთავრობის პოზიცია, რომ საქართველო და ქართველი ხალხი იმსახურებს კანდიდატის სტატუსს. ჩვენ არ ვამბობთ, რომ იდეალურები ვართ. არცერთი ქვეყანა და მთავრობა არაა იდეალური. ეს არის მუდმივი პროცესი, საჭიროა მუდმივი ჩართულობა. რეკომენდაციების ძირითადი ნაწილი შესრულებულია, ეს არის პროცესი, რომელზეც ჩვენ მზად ვართ, გავაგრძელოთ მუშაობა ევროკომისიასთან. კიდევ ერთხელ მინდა აღვნიშნო, რომ ყველამ ამ ქვეყანაში, მმართველმა პარტიამ, ხელისუფლებამ, პრეზიდენტმაც, ოპოზიციამაც - ყველამ უნდა თქვას ხმამაღლა და მკაფიოდ, რომ წლის ბოლოს საქართველოს უნდა მიეცეს კანდიდატის სტატუსი. ეს არის ერთადერთი სწორი ისტორიული პოლიტიკური გადაწყვეტილება“, - აცხადებს ღარიბაშვილი.