QooQy Bakery წლის ბოლომდე 2 ფილიალის დამატებას გეგმავს

QooQy Bakery • ქუქი ბეიქერი გაფართოებას გეგმავს და წლის ბოლომდე 2 ფილიალის დამატებას განიხილავს. გარდა დედაქალაქისა QooQy Bakery გაიხსნება ბათუმშიც. როგორც Business Insider Georgia-სთან QooQy Bakery-ის გაყიდვების დეპარტამენტის ხელმძღვანელმა ნია ნინუა განაცხადა, ახალი ფილიალების გახსნა ტურისტულად მიმზიდველ ადგილებში იგეგმება. 

„წლის ბოლომდე გვინდა დავამატოთ ერთი ფილიალი თბილისში და ერთი ფილიალი ბათუმში. დღეისათვის QooQy Bakery 4 ფილიალს აერთიანებს და ოთხივე ფილიალი მდებარეობს თბილისში. ამ დროისათვის აქტიურად ვეძებთ ფართებს და შემოთავაზებებს განვიხილავთ. გვინდა, რომ ჩვენი ფილიალები ტურისტულ ლოკაციებზე იყოს, რადგანაც ჩვენი მომხმარებლების 70%-ი არის უცხო ქვეყნების მოქალაქეები. ამიტომ აქტიურად ვეძებთ და გვინდა, რომ QooQy Bakery-ის ფილიალები იყოს ტურისტულად მიმზიდველ ადგილებში“, - აცხადებს ნია ნინუა.

QooQy Bakery ფილიალების ზრდის პარალელურად ასორტიმენტის ზრდაზეც მუშაობს. უკვე ცნობილია, რომ გაფართოვდება ტორტების და მზა საკვების მიმართულებები.

„რაც შეეხება ასორტიმენტის ზრდას, QooQy Bakery აქტიურად მუშაობს, რომ ტორტების ხაზი გავაფართოოთ და საკმაოდ მისაღები ფასები გვქონდეს. დღეისათვის ჩვენ საშუალოზე ოდნავ მაღალი სეგმენტზე ვართ გათვლილები, თუმცა ტორტი ისეთი მიმართულებაა, რომ გვინდა შედარებით დაბალ ფასებშიც გვქონდეს და ყველამ შეძლოს მისი შეძენა. თუმცა დაბალი ფასი არ ნიშნავს, რომ დაბალფასიან ნედლეულს გამოვიყენებთ. არავითარ შემთხვევაში. QooQy Bakery-ისთვის ხარისხი ნომერ პირველი საკითხია და მხოლოდ უმაღლესი ხარისხის ნედლეულით ვამზადებთ ყველაფერს.

ტორტების მიმართულების განვითარების პარალელურად გვინდა, რომ განვავითაროთ ასევე მზა საკვების მიმართულება, რაშიც იგულისხმება უშუალოდ ლანჩი, სენდვიჩები, სალათები, ვრაპები და ასე შემდეგ. პურები, ორცხობილები და კრემიანები იმდენად გაქვს განვითარებული, რომ დამატებას აღარ საჭიროებს“, - აცხადებს  QooQy Bakery-ის გაყიდვების დეპარტამენტის ხელმძღვანელი.

კომპანიის ზრდის პარალელურად დღის წესრიგში დგება კადრების ზრდის თემაც. 

„ფილიალების ზრდა და წარმოების გაფართოება მოითხოვს კადრების დამატებას. ყველგან დაგვჭირდება გაფართოება, ეს შეეხება დისტრიბუციასაც. 

ამ დროისათვის დაახლოებით 70 ადამიანამდე გვყავს დასაქმებული და ერთი ფილიალის დამატება მოითხოვს მინიმუმ 10 ადამიანის დამატებას. ასევე ბათუმის შემთხვევაში ყველაფერი თავიდან იქნება ასაწყობი და იქ შესაძლოა 20-25 ადამიანიც კი დაგვჭირდეს, რადგანაც წარმოებაც იქ უნდა აეწყოს, რადგანაც მიწოდება თბილისიდან ვერ მოხდება“, - აცხადებს QooQy Bakery-ის გაყიდვების დეპარტამენტის ხელმძღვანელი.

ამ დროისათვის QooQy Bakery-ის ბრენდის ქვეშ კაფე-საკონდიტრო და სახაბაზო, სადაც  200-ზე მეტი სახეობის ორცხობილა, არტიზანული პურ-ფუნთუშეული, ტორტი, დესერტი, ვეგანური პროდუქცია მზადდება და ყავისა და ცივი სასმელების დაგემოვნებაა შესაძლებელი.

QooQy Bakery თბილისში 4 ფილიალითაა წარმოდგენილი. ბრენდი ადგილობრივ ბაზარზე 2021 წლიდან ოპერირებს.