„ორბი ჯგუფს“ გარემოზე ზემოქმედების შეფასების დოკუმენტის წარმოდგენის ვალდებულება არ ჰქონდა - ოთარ შამუგია ბახმაროს პროექტზე

„ორბი ჯგუფს“ ბახმაროს პროექტზე, გარემოზე ზემოქმედების შეფასების დოკუმენტის წარმოდგენის ვალდებულება არ ჰქონდა. ამის შესახებ გარემოს დაცვსა და სოფლის მეურნეობის მინისტრმა ოთარ შამუგიამ განაცხადა. 

„დოკუმენტების წარმოდგენას რაც შეეხება, „ორბი ჯგუფს“ აქვს ნებართვა აღებული ადგილობრივი ხელისუფლებისგან, როგორც ამას ითვალისწინებს კანონი. რაც შეეხება გზშ-ს ნაწილს, მოქმედი კანონმდებლობით, 10 ჰექტრამდე განაშენიანების პროექტზე გზშ-ს ანგარიშის წარმოდგენა არ არის სავალდებულო. შესაბამისად, როგორც ვიცი 5,2 ჰექტარზე აქვს „ორბს“ განაშენიანების უფლება რაზეც ნებართვაა გაცემული. შესაბამისად კომპანიას, ამ ტიპის ნებართვა გარემოს დაცვის სააგენტოდან არ ესაჭიროებოდა“, - განაცხადა შამუგიამ. 

კომპანია „ორბი ჯგუფი“ ბახმაროში, მრავალფუნქციური სასტუმროს მშენებლობას იწყებს.მრავალფუნქციური სასტუმრო კომპლექსის აპარტამენტების გაყიდვა უკვე დაიწყო. პროექტის ტერიტორია მოიცავს 8 ჰექტარ მიწის ნაკვეთს, საიდანაც 1 ჰექტარზე სასტუმრო კომპლექსის შენობა განთავსდება, ხოლო 7 ჰექტარი დაეთმობა რეკრეაციულ და დასასვენებელ სივრცეებს. სასტუმრო კომპლექსი გააერთიანებს 350 აპარტამენტს და სასტუმრო ინფრასტრუქტურას. კომპლექსში განთავსდება სპორტულ მოედნები, რესტორნები, კაფეები, სპა და სპორტულ გამაჯანსაღებელი ცენტრები, მოეწყობა ასევე დასასვენებელი პარკი, ატრაქციონები, რეკრეაციული ზონები, ბავშვთა გასართობი ცენტრი, კინო-თეატრი, საცურაო აუზი და პარკინგი, რაც კურორტს საშუალებას მისცემს ყოველწლიურად 300 000-ზე მეტ ტურისტს მოემსახუროს.

კომპლექსის დასრულების ვადა 2025 წლის დეკემბერია.

შეგახსენებთ, რომ საქართველოს მთავრობის განკარგულებით, კომპანია „ორბი ჯგუფ ბახმაროს“ კურორტ ბახმაროში 9 მიწის ნაკვეთი საკუთრებაში, სიმბოლურ ფასად, 1 ლარად 2019 წლის 15 მაისს გადაეცა. ნაკვეთების საერთო ფართობი 43 269 კვ.მ-ია.

განკარგულების თანახმად, კომპანიამ არანაკლებ 50 მილიონი ლარის ინვესტიცია უნდა განახორციელოს. შესაბამისი ხელშეკრულების გაფორმებიდან 5 წლის ვადაში „ორბი ჯგუფს“ ამ მიწის ნაკვეთებზე, ან მათ ნაწილზე მრავალფუნქციური კომპლექსის აშენება ევალება, რაც მოიცავს არანაკლებ 120-ნომრიან სასტუმროებს, კვების ობიექტებს, სპორტულ მოედნებსა და სხვა ინფრასტრუქტურას. ხელშეკრულების გაფორმებიდან 10 წლის ვადაში „ორბი ჯგუფისთვის“ გადაცემულ მიწის ნაკვეთებზე მრავალბინიანი საცხოვრებელი სახლი არ უნდა აშენდეს.

2023  წლის მარტში კურორტ ბახმაროს მაღალმთიანი დასახლების სტატუსიც მიენიჭა.

„ორბი ჯგუფი ბახმარო“ 2018 წლის 27 დეკემბერს არის რეგისტრირებული. მისი დირექტორი ირაკლი კვერღელიძეა, ხოლო 100 % წილის მესაკუთრე ზვიად ზოიძეა.

იგივე თემაზე: 

რატომ არ არსებობს ბახმაროს პროექტზე გარემოზე ზემოქმედების შეფასების დოკუმენტი - „ორბი ჯგუფის“ განმარტება