„საერთაშორისო ანალიტიკური ლაბორატორიის საქმიანობა პირდაპირ კავშირშია სუფთა გარემოსა და ჯანსაღ პროდუქტთან"– BAG

საქართველოს ბიზნეს ასოციაცია ულოცავს წევრ კომპანია „მედ დიაგნოსტიკას" საერთაშორისო ანალიტიკური ლაბორატორიის ოფიციალურ გახსნას. ლაბორატორია გამოირჩევა მაღალტექნოლოგიური კვლევებითა და ანალიზებით, რომელიც განსაკუთრებული ხარისხით და სიზუსტით ტარდება და სრულ შესაბამისობაშია ევროკავშირის სტანდარტებთან. ლაბორატორია აკრედიტებულია სსტ ისო/იეკ 17025:2017/2018 სტანდარტის შესაბამისად, აკრედიტაციის ერთიანი ეროვნული ორგანოს მიერ.

საერთაშორისო ანალიტიკური ლაბორატორიის საქმიანობა მოიცავს აგრარულ, ვეტერინარულ და სურსათის უვნებლობის მიმართულებებს, რომელზეც 500-მდე კვლევას სთავაზობს, როგორც ბიზნეს სექტორსა და ფერმერებს, ასევე კერძო პირებს.

ლაბორატორიის კვალიფიციური პერსონალი ნიმუშის აღებას საქართველოს ნებისმიერ რეგიონსა და ობიექტზე ახორციელებს და მომხმარებელს მაღალი ხარისხის სერვისებსა და კვლევებს სთავაზობს, რაც თავის მხრივ, გამორჩეულს ხდის რეგიონში.

აღსანიშნავია, რომ ლაბორატორია მომხმარებელს სთავაზობს სურსათის უვნებლობის (HACCP) მიმართულებით სრულ ლაბორატორიულ მომსახურებას, ისევე როგორც საქართველოს კანონმდებლობით განსაზღვრულ სრულ ქიმიურ და მიკრობიოლოგიურ კვლევებს, როგორც სასმელ წყალზე, ზედაპირულ და მინერალურ წყლებზე, ასევე ხორცეულისა და ძეხვეულის ნაწარმზე, რძის პროდუქტსა და კარაქზე.

ლაბორატორიაში ხორციელდება პურ-ფუნთუშეულის, მარცვლეულისა და თხილეულის დეტალური კვლევა. ის, ასევე გამოირჩევა სრული ქიმიურ-მიკრობიოლოგიური ნიადაგის კვლევით, ვეტერინარული პრეპარატების ნარჩენებისა და დამაბინძურებლების და ცხოველის საკვებში ანტიბიოტიკების ნარჩენების დეტალური შესწავლითა და ანალიზით.  

საერთაშორისო ანალიტიკური ლაბორატორიის მომსახურება გათვლილია კვების პროდუქტების მწარმოებელ და მარეალიზებელ ობიექტებსა და სასტუმროებზე, საწარმოებზე, სამკურნალო-პროფილაქტიკურ დაწესებულებებზე, ასევე სამრეწველო და საყოფაცხოვრებო დანიშნულების დაწესებულებებსა და სოფლის მეურნეობისა და ვეტერინარიულ მიმართულებებზე. 

„ეს არის ჩვენი ჰოლდინგის კიდევ ერთი პროექტი, რომლის წარმატებაში ეჭვი არ გვეპარება, რადგან აღნიშნული მნიშვნელოვანია, როგორც ბიზნეს სუბიექტების ეფექტიანი საქმიანობისთვის, ასევე ჩვენი მოსახლეობის ჯანმრთელობისა და უსაფრთხო გარემოსთვის. ჩვენი მიზანია ევროკავშირის სტანდარტებთან შესაბამისობაში აგრარული, ვეტერინარული და სურსათის უვნებლობის მიმართულებით მომხმარებელს მაღალპროფესიული სერვისები შევთავაზოთ, რაც თავის მხრივ უზრუნველყოფს ჯანსაღ გარემოსა და საკვებს. ასევე მიგვაჩნია, რომ ლაბორატორიას შეუძლია პოზიტიური წვლილის შეტანა, როგორც ჯანსაღი გარემოს შექმნაში, ასევე ქვეყნის ეკონომიკის განვითარებაში" განაცხადა საერთაშორისო ანალიტიკური ლაბორატორიის დამფუძნებელმა ნათია ცაბუტაშვილმა.

„ვულოცავთ საერთაშორისო ანალიტიკურ ლაბორატორიას, მის დამფუძნებლებსა და გუნდს ამ დიდ წარმატებას, ის სამი მიმართულება, რომელზეც ლაბორატორია ფოკუსირდება პირდაპირ კავშირშია სუფთა გარემოსა და ჯანსაღ პროდუქტთან, რაც ძალიან მნიშვნელოვანია ჩვენი მოქალაქეებისა და მომავალი თაობებისთვის.  გარდა ამისა აღსანიშნავია, ინვესტიცია, რომელიც ამ პროექტის განხორციელებაში ჩაიდო და რაც ცალსახად პოზიტიურად აისახება ჩვენი ქვეყნის ეკონომიკაზე" განაცხადა საქართველოს ბიზნეს ასოციაციის პრეზიდენტმა სოსო ფხაკაძემ.