რა გაძვირდა ქვეყანაში ყველაზე მეტად

ერთი წლის განმავლობაში ყველაზე მეტად სასტუმროების, კაფეების და რესტორნების მომსახურება გაძვირდა. როგორც საქსტატის მონაცემებიდან ირკვევა 2023 წლის მაისში 2022 წლის მაისთან შედარებით სასტუმროები, კაფეები და რესტორნები 11,1%-ით გაძვირდა.

ხოლო რაც შეეხება თვიურ ჭრილში, მაისში აპრილთან შედარებით გაძვირებამ 0,7%-ი შეადგინა. 

მეორე ადგილზეა ალკოჰოლური სასმელები, თამბაქო, ამ ჯგუფში ფასებმა წლიურ ჭრილში 7,1%-ით მოიმატა, ხოლო თვიურ ჭრილში 1,6%-ით.

წლიურად ფასები მომატებულია როგორც ალკოჰოლური სასმელების (9.1 პროცენტი), ისე თამბაქოს ნაწარმის (5.0 პროცენტი) ქვეჯგუფებზე.

ერთი წლის განმავლობაში განათლება გაძვირდა 6.8%-ით. მაისში აპრილთან შედარებით განათლების კუთხით ფასთა ცვლილება არ დაფიქსირებულა და მაისშიც აპრილის დონეზე დარჩა.

5%-იანი გაძვირება ფიქსირდება ავეჯის, საოჯახო ნივთების, სახლის მოვლის პროდუქტებზე. თვიურ ჭრილში კი გაძვირების მაჩვენებელი 1%-ია.

3,7%-იანი გაძვირება ფიქსირდება წლიურ ჭრილში საცხოვრებელი, წყალი, ელ.ენერგია, აირის ჯგუფზე, თვიურ ჭრილში კი პირიქით 0.1%-ით გაიაფდა კიდეც. 

მაისიდან მაისამდე პერიოდში სურსათი და უალკოჰოლო სასმელები გაძვირდა 3,3%ით, ხოლო მაისში აპრილთან შედარებით კი 1,7%-ით გაიაფდა.