საქართველოს ბიზნეს ასოციაციაში დეტალურად განვიხილეთ საქართველოს მთავრობის დადგენილებები, რომელიც აქტიური ფარმაცევტული ინგრედიენტებისა და მზა ფარმაცევტული პროდუქტების საქართველოში იმპორტის ახალ სტანდარტებს აწესებს. მაღალი ალბათობით, ამ დადგენილებების მოთხოვნები შექმნის მნიშვნელოვან შეფერხებას ფარმაცევტული პროდუქტების იმპორტიორებისა და წარმოებისას. დასაფასებელი და მისასალმებელია, რომ მიმდინარე წლის მარტის თვეში ხელისუფლებამ გაითვალისწინა ჩვენი თხოვნა და მოხდა ამ დადგენილებების გადავადება 6 თვის ვადით, - ამის შესახებ საქართველოს ბიზნეს ასოციაციის პრეზიდენტმა სოსო ფხაკაძემ განაცხადა.
მისი თქმით, ამასთან, 6 თვიანი ვადის გასვლამდე, საჭიროა, ამ დადგენილებების მოდიფიცირება ისეთი გზით, რომ არ დაზიანდეს არც ბიზნესის და არც სახელმწიფოს ინტერესები.
„შესაბამისად, ამ და სხვა საკითხებზე, ჩვენ გავაგრძელებთ პროფესიულ და კონსტრუქციულ თანამშრომლობას დევნილთა, შრომის, ჯანმრთელობისა და სოციალური დაცვის სამინისტროსთან. აქვე აღნიშნავთ, რომ ჩვენი მთავარია ამოცანაა, როგორც ბიზნეს სექტორის ინტერესების წარმოდგენა, ასევე მოქალაქეებისა და პაციენტებისთვის ხარისხიანი და ხელმისაწვდომი ფარმაცევტული პროდუქციის შეუფერხებელი მიწოდების უზრუნველყოფა. ეს არის ის საერთო პრინციპი, რაზეც სახელმწიფო და კერძო სექტორი თანხმდება" განაცხადა საქართველოს ბიზნეს ასოციაციის პრეზიდენტმა სოსო ფხაკაძემ.
საქართველოს ბიზნეს ასოციაციაში ჯანდაცვის კომიტეტის ფარგლებში, რომელსაც ასოციაციის წევრი ფარმაცევტული კომპანიები ესწრებოდნენ, საქართველოს მთავრობის 2024 წლის 51-ე და 52-ე დადგენილებები კიდევ ერთხელ დეტალურად განიხილეს.
აღნიშნული ორი დადგენილება აწესებს როგორც მზა ფარმაცევტული პროდუქციის, ასევე ადგილობრივი წარმოებისთვის აუცილებელი აქტიური ფარმაცევტული ინგრედიენტების საქართველოში იმპორტის ახალ სტანდარტებს. აღსანიშნავია, რომ დევნილთა, შრომის, ჯანმრთელობისა და სოციალური დაცვის სამინისტროსთან კომუნიკაციის შემდეგ ა.წ. მარტში განსახილველი დადგენილებები 6 თვით გადავადდა, რადგან არსებობდა საფრთხე, რომ დადგენილებებს მნიშვნელოვანი უარყოფითი შედეგები შეიძლება გამოეწვია ფარმაცევტულ ბაზარზე.
უახლესი
