ჩვენთვის მნიშვნელოვანია, რომ სსფ-სთან ძალიან მყარი თანამშრომლობა გაგრძელდეს - ნათია თურნავა

საქართველოს ეროვნული ბანკის პრეზიდენტის მოვალეობის შემსრულებელი ნათია თურნავა აცხადებს, რომ მნიშვნელოვანია საერთაშორისო სავალუტო ფონდთან მყარი თანამშრომლობა გაგრძელდეს.

„ჩვენთვის ძალიან მნიშვნელოვანია, რომ სსფ-სთან ძალიან მყარი თანამშრომლობა გაგრძელდეს პროგრამა იცით, რომ არ არის შეწყვეტილი, მაგრამ გაზაფხულიდან მისი მეორე მიმოხილვა გადაიდო. ჩვენ საკმაოდ ოპტიმისტურად ვართ განწყობილები, გვაქვს ძალიან მჭიდრო კომუნიკაცია სსფ-ს გუნდთან, ვიცით თუ რა მიმართულებებით უნდა ვიმუშაოთ, რომ პროგრამის აღდგენა -აქტივაცია დაჩქარდეს.

ერთ-ერთი მიმართულება ეს არის სებ-ის ინსტიტუციური და მისი დამოუკიდებლობის გაძლიერება. დღესდღეობით ჩვენი კონსტიტუციითა და კანონმდებლობით ჩვენი დამოუკიდებლობა გარანტირებულია. მაგრამ ყოველთვის არის შესაძლებლობა, რომ გავაძლიეროთ ინსტიტუციურად ჩვენი ორგანიზაცია. ამ თვალსაზრისით ვმუშაობთ გარკვეულ საკანონმდებლო პაკეტზე, ინიციატივებზე“, - აღნიშნა თურნავამ.

საერთაშორისო სავალუტო ფონდმა საქართველოსთვის სამწლიანი პრევენციული მხარდამჭერი პროგრამის (Stand-By Arrangement) ფარგლებში, 289 მილიონი აშშ დოლარის ოდენობის სესხი, 2022 წლის ივნისში დაამტკიცა. ერთი წლის თავზე კი ფონდმა პროგრამა შეაჩერა.