საერთაშორისო სავალუტო ფონდი (სსფ) საქართველოს ეროვნული ბანკის (სებ) მიერ სანქციების აღსრულების წესში შეტანილ ცვლილებებზე კომუნიკაციას გეგმავს როგორც სებ-თან, ასევე კომერციულ ბანკებთან. როგორც Business Insider Georgia-ს სსფ-ში განუმარტეს, მოხდება ამ ცვლილების გავლენის ზუსტი შეფასება, მათ შორის სსფ-ს მხარდაჭერილ საქართველოს პროგრამაზე, რომლის აღდგენის მიზნით მოლაპარაკებები მიმდინარეობს.
„როგორც აღვნიშნეთ, წარსულში საქართველოს ეროვნული ბანკის სწრაფმა და შესაბამისმა ქმედებამ ფინანსური სექტორი დაიცვა უკრაინაში მიმდინარე რუსეთის ომის გავლენისგან. საქართველოს ეროვნულმა ბანკმა კომერციულ ბანკებს შესაბამისი სანქციების დაცვა მოსთხოვა. ჩვენ შეშფოთებული ვართ ეროვნული ბანკის ბოლოდროინდელი განცხადებით, რომელიც სანქციების მიმართ მიდგომას ცვლის. ჩვენ ვაპირებთ ამ საკითხის დეტალურ განხილვას ეროვნულ ბანკთან და კომერციულ ბანკებთან და ზედმიწევნითი შესწავლის შემდეგ მოვახდენთ მისი გავლენის ზუსტ შეფასებას, მათ შორის სსფ-ს მხარდაჭერილ საქართველოს პროგრამაზე, რომლის აღდგენის მიზნით მოლაპარაკებები მიმდინარეობს“- განაცხადა სავალუტო ფონდის მისიის უფროსმა ჯეიმს ჯონსმა.
