ვალუტის გაცვლის ინოვაციური პლატფორმა Kursi.ge 1 წლისაა - როგორია მიღწევები და სამომავლო გეგმები

ინოვაციური პლატფორმა Kursi.ge, სადაც ვალუტის კონვერტაცია საუკეთესო ონლაინ კურსითაა შესაძლებელი, 1 წლის გახდა. თუ საქმიანობის დასაწყისში სტარტაპი დღეში 50-მდე კონვერტაციას აკეთებდა,  დღეს ეს რიხცხვი 1000-მდე გაიზარდა.  მალე Kursi.ge საკუთარ აპლიკაციასაც ჩაუშვებს და მომხმარებელს ვალუტის გაცვლის პროცესს კიდევ უფრო გაუმარტივებს.

კიდევ რა გეგმები აქვს Kursi.ge-ს და როგორ აპირებს კომპანია გაფართოებას, ამაზე  Business Insider Georgia Kursi.ge-ს დამფუძნებელს, ნინო კუპრაშვილს ესაუბრა.

- როგორი იყო Kursi.ge-ს პირველი წელი ვალუტის კონვერტაციისა და მომხმარებელთა რეგისტრაციის თვალსაზრისით?

პირველი წელი, სტარტაპისთვის ყველაზე კრიტიკული პერიოდია. ამ ეტაპზე, ხდება პროდუქტის მომხმარებლებისთვის გაცნობა, პროდუქტის ტესტირება და რეალურად, ბიზნესის პოტენციალის შეფასება. 2024 წლის 4 მარტიდან ვარსებობთ  და მას შემდეგ თითქმის ყოველ თვე ვაორმაგებთ შედეგებს. დღეისათვის უკვე დაკონვერტირებული გვაქვს 800 მილიონზე მეტი ლარი და მოვემსახურეთ 30 000 ზე მეტ მომხმარებელს. ჩვენს მომხმარებელთა რიცხვს მიეკუთვნება 1500-ზე მეტი  კომპანია. ჯამში, 1 წლის განმავლობაში 90 000 ტრანზაქციაზე მეტი გვაქვს შესრულებული. 

რომ შევაჯამო, პირველი წლის ზრდამ გვაჩვენა, რომ პროდუქტზე ნამდვილად არის მოთხოვნა. ასევე აღსანიშნავია, რომ kursi.ge-ს გუნდი 5 ადამიანისგან შედგებოდა გასული წლის მარტში, ხოლო ახლა 30-ზე მეტნი ვართ.

ამ ერთი წლის განმავლობაში მოვიგეთ GITA-ს და EBRD-ის სტარტაპერების პროგრამების გრანტები, რასაც მომხმარებლის გამოცდილების გაუმჯობესებას ვახმართ.  ჯერ ყველაფერი წინ გაქვს და ეს წელი სწრაფი განვითარების და ზრდის კიდევ უფრო დიდი ტრაექტორიის წელი უნდა იყოს, რათა კიდევ უფრო ხელსაყრელი, უფრო მარტივი, უფრო სრულყოფილი და უფრო სწრაფი მომსახურება შევთავაზოთ ჩვენს მომხმარებლებს. დარწმუნებული ვარ,  მომავალ  წელს კიდევ უფრო შთამბეჭდავ ამბებს მოგიყვებით Kursi.ge-ს შესახებ.

- დღევანდელ პორტფელში როგორია კომპანიების და კერძო პირების წილი და  რომელ მიმართულებში უფრო ხედავთ ზრდის პოტენციალს?

ორივე მიმართულებით ვხედავთ ზრდის პოტენციალს. რომ წარმოვიდგინოთ, 1500 კომპანიაზე მეტი აგენერირებს ჩვენი შემოსავლის 55-60%-ს. ანუ 800-დან დაახლოებით 400 მლნ მოდის სწორედ კომპანიებზე, ხოლო დანარჩენი - კერძო პირებზე. თუმცა რაოდენობრივად ფიზიკური პირი გაცილებით მეტია - 28 000 ზე მეტი მომხმარებელი აკონვერტირებს თანხას ჩვენს პლატფორმაზე.

რეალურად, ჩვენს პროდუქტს ორივე სეგმენტისთვის მოაქვს სარგებელი და მოთხოვნაც ორივე მიმართულებით მზარდია. შესაბამისად, ჩვენც ორივე სეგმენტზე ვართ ფოკუსირებული.

მცირე და საშუალო ბიზნესები ძალიან კარგად იყენებენ ჩვენს მომსახურებას, რადგან მათთვის ძალიან მნიშვნელოვანია იმ თანხების დაზოგვა, რასაც ჩვენთან კონვერტაციით ზოგავენ. თანაც ჩვენგან იღებენ პერსონალიზებულ მომსახურებას და სტარტაპის მთელი აზრიც ის არის, რომ ძალიან ინდივიდუალურად ვუდგებით ჩვენს მომხმარებლებს. ანალოგიურად, კერძო პირებიც ძალიან მარტივად და უსაფრთხოდ აკონვერტირებენ თანხას.  კვლევები გვიჩვენებს, რომ მომხმარებლები ჩვენი სერვისით კმაყოფილები არიან და Kursi.ge-ზე დაზოგილი თანხა  მათთვის ძალიან მნიშვნელოვანია. შესაბამისად, ამ მიმართულებით ფოკუსირებას და ზრდას ვაგრძელებთ.

- თქვენი შეფასებით, რა არის Kursi.ge-ს უპირატესობა ბაზარზე და რატომაა ის მიმზიდველი მომხმარებლებისთვის?

ფულის გადახურდავებისთვის, kursi.ge-ს გამოჩენამდე, მომხმარებელს ორი ალტერნატივა ჰქონდა: კარგი კურსით ჯიხურში თანხის კონვერტაცია, რაც  დროისა და ენერგიის დახარჯვას მოითხოვს,  ან ინტერნეტ ან მობილ ბანკით ვალუტის გაცვლა, სადაც უფრო ცუდი კურსი გამოუვა. პირველ შემთხვევაში კარგავს დროს, ხოლო მეორე შემთხვევაში - ფულს.

Kursi.ge-ს შემთხვევაში, დროც იზოგება, ენერგიაც და ფინანსებიც. ანუ ჩვენი მეშვეობით მომხმარებელი თან კარგ კურსს იღებს, თან დრო და ენერგია არ ეხარჯება და სულ რამდენიმე კლიკით, მაქსიმუმ 15 წუთში უკვე დაკონვერტირებული თანხა არის მის ანგარიშზე. დღევანდელ დღეს, მომხმარებელი საშუალოდ 4-5 წუთში იღებს დაკონვერტირებულ თანხას ანგარიშზე.

- რა გეგმები გაქვთ პლატფორმის ფუნქციური გაუმჯობესების თვალსაზრისთ?

იანვარში გადავედით ახალ ინტერფეისზე, ანუ განახლებული ვებ გვერდის დიზაინი შევთავაზეთ მომხმარებელს. ამ მიმართულების კიდევ ვგეგმავთ ცვლილებებს, რომ Kursi.ge  კიდევ უფრო მიმზიდველი, მარტივი და საინტერესო გავხადოთ.

ამავდროულად ვმუშაობთ აპლიკაციაზე, რომელიც სრულად სექტემბერში გაეშვება. თუმცა მანამდე რამდენიმე თვის განმავლობაში სატესტო რეჟიმში იმუშავებს.

ვგეგმავთ ასევე დამატებითი ვალუტების ინტეგრაციას ჩვენს პლატფორმაზე. ახლა გაქვს მხოლოდ ლარი, დოლარი,  ევრო და დოლარი-ევროს წყვილი. ცხადია ვგეგმავთ სხვა ვალუტების დამატებასაც. დღეისათვის ვატარებთ კვლევას, რა ვალუტებზეა ყველაზე დიდი მოთხოვნა, რომ მომხმარბლების პრეფერენციების მიხედვით შევთავაზოთ ახალი ვალუტები.

- როგორია თქვენი თანამშრომლობა ბანკებთან და ხომ არ გეგმავთ ბაზრის სხვა მონაწილეებთან თანამშრომლობასაც?

ამჟამად მხოლოდ საქართველოს და თიბისი ბანკიდან შეიძლება ჩვენთან კონვერტაცია. ვფიქრობთ გაფართოებას, თუმცა ჯერჯერობით უფრო მეტ ფოკუსს ვალუტების დამატებაზე ვაკეთებთ. შემდეგი ეტაპი კი სხვა ბანკებთან ინტეგრაცია იქნება.

ჩვენი მარეგულირებელი არის საქართველოს ეროვნული ბანკი. ძალიან დიდი მადლობა მინდა გავუხადო სებ-ს, რადგანაც ამ ერთის წლის განმავლობაში ძალიან დაგვეხმარა ზრდასა და განვითარებაში. რეგულაციამ მოიტანა ის, რომ უსაფრთხოება კიდევ უფრო მეტადაა დაცული და ამაში საკმაოდ დიდი რესურსი ჩავდეთ. დღეს მომხმარებელს შეუძლია თავი დაცულად იგრძნოს, რადგან მისი მონაცემებიც სრულად დაცულია და მისი თანხაც უსაფრთხოდაა.

- ხომ არ განიხილავთ გაფართოებას და მაგალითად რეგიონის ფარგლებში?

რა თქმა უნდა! ვფიქრობთ, რომ 2025 წლის ბოლოს უკვე დამატებით ერთ ქვეყანაში ვიქნებით. განვიხილავთ რეგიონის მეზობელ ქვეყნებს და გვაქვს მოლაპარაკებები იქაურ ცენტრალურ ბანკებთან, რათა მსგავსი ინოვაციით შევიდეთ.

- როგორი შეთავაზებები გაქვთ არსებული მომხმარებლებისთვის და ამ მიმართულებით თუ გეგმავთ სიახლეებს?

2025 წლის პრიორიტეტს წარმოადგენს მომსახურების კიდევ უფრო დახვეწა და მომხმარებლისთვის მაქსიმალურად მარტივი პროცესის შეთავაზება.

აპრილის პირველი რიცხვებიდან მუშაობას დავიწებთ 08:00 საათზე და დავასრულებთ 03:00 საათზე. ხოლო სექტემბრიდან უკვე 24-საათიანი რეჟიმით მოვემსახურებით ჩვენს მომხმარებლებს. ანუ ნებისმიერ დროს შეეძლებათ Kursi.ge-ზე თანხის კონვერტაცია.

ასევე ვგეგმავთ ახალი სერვისების, კერძოდ, სავალუტო გადარიცხვების დამატებას როგორც ლოკალურად, ისე საერთაშორისო დონეზე. გვაქვს ღია ბანკინგი, რომელიც მომხმარბელს საშუალებას აძლევს თანხა ერთი კლიკით დააკონვერტიროს. ამ მიმართულებას, რომელიც ადგილობრივ პარტნიორთან ერთად ხორციელდება,  კიდევ უფრო დავხვეწავთ ამ წლის განმავლობაში.