„ტურიზმის შესახებ“ კანონპროექტის ხარჯთსარგებლიანობის ანალიზის შედეგების პრეზენტაცია გაიმართა დღეს „რესპუბლიკა ივენთ ჰოლში“.
პრეზენტაცია კერძო-საჯარო დიალოგის საპარლამენტო პლატფორმის ფარგლებში ჩატარდა, რომელშიც მონაწილეობდნენ დარგობრივი ეკონომიკისა და ეკონომიკური პოლიტიკის კომიტეტის წევრები, ტურიზმის ეროვნული ადმინისტრაციისა და კერძო სექტორის წარმომადგენლები.
USAID-ის ეკონომიკური მმართველობის პროგრამისა და მისი გრანტიორი ორგანიზაციის, PMO კონსალტინგის მიერ მომზადებული პრეზენტაცია მოიცავს ინფორმაციას საქართველოს მდგრად ეკონომიკურ განვითარებაში ტურიზმის რეფორმის წვლილის თაობაზე.
პრეზენტაციისას აღინიშნა, რომ ხარჯთსარგებლიანობის ანალიზის მიზანია შეაფასოს მარეგულირებელ ჩარჩოში შეტანილი ცვლილებების გავლენა ტურიზმის სექტორსა და ზოგადად ეკონომიკაზე და ასევე განსაზღვროს კანონპროექტის მოსალოდნელი ზეგავლენა სხვადასხვა სფეროზე.
ანგარიშის თანახმად, ტურიზმის რეფორმის განხორციელების მოსალოდნელი შედეგების შეფასების შედეგად გამოვლინდა, რომ კანონპროექტის გავლენა დადებითი იქნება და მათი წმინდა სარგებლის მიმდინარე ღირებულება 2023-2033 წლებში ჯამურად 4.3 მილიარდ ლარს მიაღწევს, რაც ფინანსურ ხარჯსა და სარგებელთან ერთად მოიცავს ისეთ არამონეტარულ გავლენებს, როგორიცაა კადრების დატვირთულობის ზრდა, მომხმარებელთა სერვისების ხარისხისა და მათი უფლებების დაცვის მარეგულირებელი ჩარჩოს გაუმჯობესება.
„კომიტეტი აქტიურად მუშაობდა „ტურიზმის შესახებ“ კანონპროექტზე, რომელიც მთლიანად ცვლის ახლა მოქმედ, 1997 წელს მიღებულ კანონს „ტურიზმისა და კურორტების შესახებ“ და სრულიად ახლებურად განსაზღვრავს დარგში მოქმედი სუბიექტების, სერვისებისა და სახელმწიფო ორგანოების უფლებამოსილებებს. კანონპროექტის ხარჯთსარგებლიანობის ანალიზმა ცხადყო, რომ ეფექტური მარეგულირებელი ჩარჩოს შექმნა განსაზღვრავს კონკურენტუნარიან გარემოს ტურიზმის ბაზარზე, მოიტანს დადებით ფინანსურ შედეგებს და შესაბამისად, ხელს შეუწყობს ქვეყნის ეკონომიკის განვითარებას. ვიმედოვნებ, რომ ახალ კანონზე მუშაობის დროს ორმხრივი კომუნიკაცია და დიალოგი ხელს შეუწყობს ოპტიმალური და მოქნილი საზედამხედველო მექანიზმებისა და პროცედურების შემუშავებას, რაც უზრუნველყოფს ტურიზმის სფეროში მოქმედი კომპანიების კანონპროექტის მოთხოვნებთან ეტაპობრივად და უმტკივნეულოდ ადაპტირებას“, - განაცხადა პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ დავით სონღულაშვილმა.
