ცოდნისგან დაღლილი ტვინი არ არსებობს - გიორგი ხუბუა

ქუთაისის საერთაშორისო უნივერსიტეტი (KIU), რომელიც დამოუკიდებელი საქართველოს ისტორიაში პირველი სახელმწიფო უნივერსიტეტია აქტიურად თანამშრომლობს როგორც კერძო სექტორთან, ისე სახელმწიფო უწყებებთან. როგორც „იმედის დილაში“ რუბრიკა Business Insider Georgia-ში სტუმრობისას ქუთაისის საერთაშორისო უნივერსიტეტის რექტორმა გიორგი ხუბუამ განაცხადა, KIU საკმაოდ გახსნილი უნივერსიტეტია, რომელიც რეალურ პროექტებზე დაფუძნებული მიდგომით ახორციელებს საქმიანობას. 

„ჩვენი მიდგომა არის, რომ ქუთაისის საერთაშორისო უნივერსიტეტი მაქსიმალურად გახსნილი იყოს. დავიწყეთ ძალიან აქტიური თანამშრომლობა სებ-თან, სწორედ რეალურ პროექტზე დაფუძნებული მიდგომით. ასევე საქართველოს აეროპორტების გაერთიანებასთან, საქპატენტთან ერთად განვახორციელებთ ერთობლივ სამაგისტრო პროგრამას, რომელიც ასევე მოიცავს ინოვაციებისა და მეწარმეობის კუთხით კულტურის განვითარებას. არსებითად ჩვენ მოგვიწევს და აუცილებლად უნდა შევცვალოთ ზოგადად ეს დამოკიდებულება. მეწარმეობა ნიშნავს, რომ სტუდენტს რისკის ელემენტი ასწავლო, ასწავლო მას, რომ წარუმატებლობა ეს არ არის დიდი უბედურება, ესეც ერთ-ერთი გამოცდილებაა. და რაც მთავარია დავანახოთ სახელმწიფო უწყებებს, კერძო სექტორს, დამსაქმებელს, რომ უნივერსიტეტს შეუძლია კარგი პარტნიორობა გაუწიოს მათ.

უახლოეს მომავალში ჩვენ ვგეგმავთ ადგილობრივი თვითმმართველობის ორგანოების თანამშრომლებისთვის გადამზადების კურსების შეთავაზებას, სწორედ ლიდერობის, კომუნიკაციების უნარ-ჩვევების გაძლიერების თვალსაზრისით. დღეს უნივერსიტეტმა სტუდენტი უნდა მოამზადოს ცვლილებებისათვის და არა ისეთი ილუზია შეუქმნას, რომ მე მზა რეცეპტებს გასწავლი და შენ მერე სიცოცხლის ბოლომდე გამოგადგება. სტუდენტს უნდა ჰქონდეს ის უნარ-ჩვევები, რომელიც მას შესაძლებლობას მისცემს, რომ მერე უკვე შეცვლილ სიტუაციაში მაქსიმალურად ადვილად მოახდინოს ადაპტირება და მიიღოს ჩვენგან არა ინფორმაცია, არამედ ცოდნა. უნივერსიტეტმა უნდა მისცეს ცოდნა. ინფორმაციის მისაღებად აუცილებელი არ არის მოხვიდე უნივერსიტეტში. ცოდნის მიღება ყოველთვის სასიამოვნო პროცესია და არც ცოდნის მიღებისგან იღლება ადამიანი. ცოდნისგან დაღლილი ტვინი არ არსებობს. ინფორმაციისგან შეიძლება დაიღალოს. ცოდნის გარეშე შეუძლებელია გაუძლო იმ გამოწვევებს, რომლების წინაშეც თანამედროვე ცხოვრება სულ უფრო და უფრო რთული გვაყენებს“, - აღნიშნა გიორგი ხუბუამ.