ოქტომბერში გაცვლითი კურსის ეფექტის გამორიცხვით, სესხები წლიურად 18.6%-ით გაიზარდა. როგორც სებ-ის თვის მიმოხილვაში წერია, წინა თვესთან შედარებით, სესხების ზრდის ტემპი 0.2 პპ-ით შემცირდა, რაც მეტწილად უცხოური ვალუტის დაკრედიტების ზრდის ტემპის შენელებამ განაპირობა. რაც შეეხება ეროვნული ვალუტით დაკრედიტებას მზარდია.
„კერძოდ, ოქტომბერში ეროვნული ვალუტით დაკრედიტება წლიურად 24%-ით გაიზარდა და მთლიანი სესხების ზრდაში 13.2 პპ წვლილი შეიტანა. ეროვნული ვალუტით დაკრედიტების ზრდა, ერთი მხრივ, ლარის ბიზნესის სესხების ზრდას უკავშირდება. ამავდროულად, მოიმატა იპოთეკური სესხების ზრდის ტემპმაც, რომლის წვლილმა მთლიანი სესხების ზრდაში 2.7 პპ შეადგინა.
ოქტომბერში სესხების საშუალო შეწონილი საპროცენტო განაკვეთი, წინა თვესთან შედარებით, 0.3 პპ-ით გაიზარდა და 13.1% შეადგინა. ეროვნული ვალუტით გაცემული სესხების საპროცენტო განაკვეთი 0.2 პპ-ით 14.8%-მდე გაიზარდა, ხოლო უცხოური ვალუტით გაცემულ კრედიტებზე საპროცენტო განაკვეთი 0.2 პპ-ით, 9.1%-მდე შემცირდა“, - აღნიშნულია სებ-ის თვის მიმოხილვაში.
ოქტომბერში იურიდიულ პირებზე ეროვნული ვალუტით გაცემული სესხების საპროცენტო განაკვეთი წინა თვესთან შედარებით 0.1 პპ-ით გაიზარდა და 11.9%-ს შეადგენს. ხოლო იპოთეკურ სესხებზე ეროვნული ვალუტით გაცემული სესხების საპროცენტო განაკვეთი 0.02 პპ-ით გაიზარდა და 11.9% შეადგინა. ოქტომბერში წინა თვესთან შედარებით, იურიდიულ პირებზე უცხოური ვალუტით გაცემული სესხების საპროცენტო განაკვეთი 0.03 პპ-ით, 9.5%- მდე შემცირდა.
ასევე უცხოური ვალუტით გაცემული იპოთეკური სესხების საპროცენტო განაკვეთი 0.1 პპ-ით 8.1%- მდე შემცირდა.
ოქტომბერში მთლიანი საკრედიტო პორტფელის დოლარიზაცია 0.8 პპ-ით, 43.3%-მდე შემცირდა. იურიდიული პირების სესხების დოლარიზაცია წინა თვესთან შედარებით 1.0 პპ-ით, 62.7%-მდე შემცირდა. ასევე ფიზიკური პირების სესხების დოლარიზაციამაც, 0.5 პპ-ით, 25.8%-მდე მოიკლო. ოქტომბერში ვადაგადაცილებული სესხები წინა თვესთან შედარებით 162.4 მლნ ლარით გაიზარდა და 790.1 მლნ ლარს გაუტოლდა. ვადაგადაცილებული სესხების 36.2% ეროვნული ვალუტით არის დენომინირებული.
უახლესი
