საგაზაფხულო სესიაზე პარლამენტი სტარტაპებისთვის ნულოვანი საგადასახადო რეჟიმის დაწესებაზე იმსჯელებს - ავთანდილ კასრაძე

საგაზაფხულო სესიაზე საქართველოს პარლამენტი უკვე იმსჯელებს ჩვენს საკანონმდებლო ინიციატივებზე, რომლის მიხედვითაც სტარტაპებისთვის ნულოვანი საგადასახადო რეჟიმი იმოქმედებს, ამის შესახებ  „იმედის დილაში“ რუბრიკა Business Insider Georgia-ში ​სტუმრობისას სააგენტოს თავმჯდომარემ ავთანდილ კასრაძემ ისაუბრა. კასრაძემ სააგენტოს სამომავლო გეგმებზეც ისაუბრა და აღნიშნა, რომ საქართველოს ნამდვილად აქვს იმის შესაძლებლობა, რომ რეგიონალური ჰაბი გახდეს.

„მოგეხსენებათ პრემიერ-მინისტრმა, ირაკლი კობახიძემ ჩვენს 10 წლის იუბილეზე, წარადგინა ეს ახალი ინიციატივა, რაც ძალიან მნიშვნელოვანი ეფექტის მატარებელი იქნება ქართული ინოვაციური სტარტაპებისთვის. ერთის მხრივ, რომ კიდევ უფრო სწრაფად განვითარდეს და მეორეს მხრივ, რეგიონიდან მოვიზიდოთ ინოვაციური სტარტაპები ჩვენს ქვეყანაში და ჩვენი ქვეყნის ეკონომიკა კიდევ უფრო გავამდიდროთ. საქართველოს ნამდვილად აქვს იმის შესაძლებლობა, რომ რეგიონალური ჰაბი გახდეს ინოვაციების მიმართულებით და ის საგადასახადო რეფორმები, რომელსაც საქართველოს პარლამენტი დაამტკიცებს მნიშვნელოვანი იქნება. განსხვავებით საწარმოსგან, მაგალითად საწარმოს გადატანას ერთი ქვეყნიდან მეორეში ძალიან ბევრი ლოგისტიკური და სხვადასხვა პრობლემა აქვს, მაგრამ ტექნოლოგიური კომპანიების მთავარი ღირებულება არის ადამიანი და სწორედ ადამიანმა უნდა გადაწყვიტოს ერთი ქვეყნიდან მეორეში გადავიდეს. საქართველო ამ მხრივ ძალიან მნიშვნელოვანია და ამას ემატება საგადასახადო ნაწილი. 

ასევე, სტარტაპების მიმართულებით დაფინანსებები გაგრძელდება და იზრდება კიდეც მათი დაფინანსება“, - განაცხადა კასრაძემ.