საჭიროა დაჩქარდეს სპეციალური პროგრამებით კადრების გადამზადება და ბიზნესებისთვის მიწოდება, რათა კომპანიებმა გაფართოება შეძლონ - ლევან ვეფხვაძე

საჭიროა დაჩქარდეს სპეციალური პროგრამებით კადრების გადამზადება და ბიზნესებისთვის მიწოდება, რათა კომპანიებმა გაფართოება შეძლონ - ლევან ვეფხვაძე როდესაც ვხედავთ, რომ კომპანიების 70%-ი  მათ პროდუქციასა და სერვისებზე მოთხოვნის გამო აპირებს გააფართოოს წარმოება ან ცდილობს ახალი სერვისები მიაწოდოს ბაზარს, ეს ახალ ტექნოლოგიებს უკავშირდება და შესაბამისად კადრების გადამზადებისთვის დროა საჭირო, - ამის შესახებ „საქართველოს ბიზნეს ასოციაციის“ აღმასრულებელმა დირექტორმა ლევან ვეფხვაძემ დღეს, „იმედის დილაში“ რუბრიკა „ბიზნესინსაიდერის“ ავტორთან გიორგი აბაშიშვილთან საუბრისას განაცხადა.

ლევან ვეფხვაძის შეფასებით, შრომის ბაზარზე არ არის შესაბამისი კადრები, ხოლო მეორეს მხრივ ამ კადრების ნაწილში რესურსი მილევადია.

BAG-ის კვლევის შესაბამისად, გამოკითხული კომპანიების 54 სპეციალისტების ნაკლებობაზე, ხოლო 42% სამუშაო ძალის ნაკლებობაზე აცხადებს.

„ერთის მხრივ, როცა უმუშევრობა მცირდება კარგია, მაგრამ მეორეს მხრივ ბიზნესი შესაძლოა, გაფართოების ნაწილში წინააღმდეგობას გადააწყდეს და არ დარჩეს კადრები, რომლის გადამზადებაც იქნება შესაძლებელი. საბედნიეროდ, ჯერ არიან ადამიანები, რომელთაც სურთ სხვა პროფესიაში გადაამზადონ. მთავარია, ჩვენ დროულად, კვალიფიციურად შევთავაზოთ ეს პროგრამები. ამაზე ვმუშაობთ განათლების სამინისტროსთან, რათა ეს პროცესი დაჩქარდეს და ბიზნესებს სწრაფად მიეწოდოთ კადრები“, - განაცხადა ლევან ვეფხვაძემ.

მისი თქმით, ძალიან მნიშვნელოვანია სასკოლო განათლებაში სწორი წარმოდგენების შექმნა, რადგან სკოლის დასრულების შემდეგ უმეტესობა ირჩევს ბიზნესადმინისტრირებას, იურიდიულ და სამედიცინო ფაკულტეტებს, როცა ისეთი სპეციფიკურ პროგრამებთან მიმართებით უნდა იყოს მოთხოვნა, რომელიც უპასუხებს ბიზნესს.

„ჩავთვალოთ, რომ ამ კუთხით ბაზარი ჩაშლილია და მეტი აქტივობაა საჭირო განათლების სამინისტროს მხრიდან, ასევე ჩვენი ყველასი, რადგან ერთ ინსტიტუციაზე პასუხისმგებლობას ვერ ჩამოვკიდებთ, რადგან ეს მენტალური ცვლილების ნაწილია, რათა ისეთი პროფესიები აირჩიონ, რომელიც დღეს დეფიციტურია და შემდეგ ბიზნესს საშუალება ექნება რომ გაფართოვდეს“, - განაცხადა ლევან ვეფხვაძემ.

საქართველოს ბიზნეს ასოციაციის ორგანიზებით კონფერენცია „საქართველოს ეკონომიკისა და სწრაფად მზარდი სექტორების პერსპექტივები“ 17 სექტემბერს იმართება, რომელსაც საქართველოს პრემიერ-მინისტრი მთავრობის წევრები და ბიზნესის წარმომადგენლები დაესწრებიან.