რუსეთის ბაზარი დუბაისა და დოჰას მიმართულებით ჩავანაცვლეთ. რუსეთში ლურჯი მოცვი აღარ გაგვაქვს, - ამის შესახებ Business Insider Georgia-ს კომპანია Geofresh-ის დირექტორის მოადგილე სალომე ყველიაშვილმა განუცხადა.
„მესამე წელია ლურჯი მოცვი უკვე აქტიურად გაგვაქვს დუბაისა და გალფის ქვეყნებში. 2023 წელს ეს მიმართულება ჩვენი მთავარი ბაზარი გახდა. ამ დროისთვის დუბაისა და დოჰას მიმართულებით 5 ტონა მოცვი გავიტანეთ. 1 კილოგრამის ფასი 7-8 დოლარია. ახალი შეკვეთების მოლოდინში ვართ“, - ამბობს სალომე ყველიაშვილი.
გასულ წელს კომპანიამ ლურჯი მოცვი ექსპორტზე სინგაპურსა და ქუვეითშიც გაიტანა. „წელს პლანტაციები განვაახლეთ, ამიტომ მოსავლიანობა 50-დან 35 ტონამდე შეგვიმცირდა.
მოცვის ნაწილს ადგილობრივ ბაზარზე ვყიდით. ძირითადად სადისტრიბუციო კომპანიებთან ვთანამშრომლობთ, რომლებიც პროდუქტს სუპერმარკეტებს აწვდიან“, - ამბობს სალომე ყველიაშვილი.
კომპანის „გლობალ გეპის“ სერთიფიკატს ფლობს. შესაძლოა Geofresh-ის პროდუქტი ექსპორტზე ევროპაშიც გავიდეს.
Geofresh-ის მოცვის ბაღები ზუგდიდში, სოფელ რუხში მდებარეობს. წელს კომპანია 35 ტონამდე მოსავალს ელოდება. ადგილობრივ ბაზარზე მოცვის საბითუმო ფასი 8-9 ლარია.
