რეალისტური სცენარია, რომ მიკრობანკების სექტორი წლიურად 20-25%-ით გაიზრდება და 2025 წლის ბოლომდე მილიარდ ლარს მიაღწევს, - ამის შესახებ Business Insider Georgia-ს საქართველოში პირველი მიკრობანკის MBC • ემბისი-ს რისკების დირექტორმა ნინო დევდარიანმა წამყვანი ევროპული საკრედიტო სარეიტინგო სააგენტო Scope Ratings-ის მიერ გაკეთებულ პროგნოზთან დაკავშირებით განაცხადა.
როგორც „ემბისიში“ აცხადებენ მიკრობანკად ტრანსფორმირებული ორი ორგანიზაციის აქტივების წილი მთლიანი მიკროსაფინანსო ბაზრის დაახლოებით 30%-ს შეადგენდა, რაც იმას ნიშნავს, რომ დღეს, მიკრობანკების სექტორის აქტივების მოცულობა 750 მილიონ ლარამდეა.
„აღნიშნული ოპტიმიზმის საფუძველს გვაძლევს ის, რომ მიკრობანკის სტატუსი ორგანიზაციებს გაზრდილი შესაძლებლობების ფარგლებში ოპერირების საშუალებას აძლევს. ათმაგდება დაკრედიტების მაქსიმალური ზღვარი, 100 ათასი ლარიდან 1 მლნ ლარამდე, რასაც ემატება დეპოზიტების მოზიდვის, მიმდინარე ანგარიშებისა და სხვა საოპერაციო პროდუქტების გამრავალფეროვნების შესაძლებლობა. აქედან გამომდინარე, „ემბისი“ ძალიან ოპტიმისტურად უყურებს ახალი ლიცენზიის ფარგლებში ოპერირების პერსპექტივებს. კომპანია წელს და მომდევნო სასტარტო წლებშიც, აქტივების მინიმუმ 20-25%-იან ზრდას ელის“, - აცხადებ „ემბისის“ რისკების დირექტორი.
ნინო დევდარიანის განმარტებით, მიკორობანკების ბაზარზე კონკურენციის ზრდა სექტორის განვითარებას კიდევ უფრო შეუწყობს ხელს.
„ამ ეტაპზე, მიკროსაბანკო სექტორში 2 ორგანიზაციაა წარმოდგენილი. თუმცა, გვაქვს მოლოდინი, რომ აღნიშნული კომპანიების ახალი ლიცენზიის ქვეშ საქმიანობის დადებითი პრეცედენტი ხელს შეუწყობს სექტორის განვითარებას და გარკვეული პერიოდის შემდეგ, იმ მიკროსაფინანსო ორგანიზაციებს, რომელთა ძირითადი ორიენტირი იქნება ბიზნესის დაკრედიტება, გაუჩნდებათ სურვილი უფრო ფართო შესაძლებლობებით იყვნენ წარმოდგენილები ბაზარზე. შესაბამისად, ვვარაუდობთ, რომ ეტაპობრივად, მიკრობანკების სექტორი რიცხობრივადაც გაიზრდება.
რაც შეეხება კონკურენციასა და კონკურენტული უპირატესობის თემას - მიკრობანკების მთავარი განმასხვავებელი ნიშანი სხვა ტიპის საფინანსო ორგანიზაციებთან მიმართებაში, არის ის, რომ მათ პირდაპირ კანონით აქვთ განსაზღვრული მიკრო, მცირე და საშუალო ბიზნესის დაკრედიტების მანდატი. „ემბისის“ მაგალითზე გეტყვით, ორგანიზაციას ზემოთ აღნიშნულ სეგმენტზე მუშაობის მრავალწლიანი გამოცდილება აქვს, შესაბამისად, მისი კონკურენტული უპირატესობაც ესაა - წარსულ გამოცდილებას დამატებული ის ახალი შესაძლებლობები, რაც ლიცენზიის მიღების შედეგად გაგვიჩნდა.
„ემბისი“ იქნება კონცენტრირებული უშუალოდ მცირე და საშუალო მეწარმეებზე და აქტიურად იმუშავებს იმაზე, რომ კომპანიის შეთავაზებები იყოს უშუალოდ ამ ჯგუფის ინტერესებზე მორგებული, მათთვის საჭირო და მისაღები. აუცილებლად უნდა გავუსვათ ხაზი „ემბისის“, როგორც მიკრობანკის ერთ-ერთ უმთავრეს უპირატესობას - ესაა მომსახურების სისწრაფე და პროცედურების სიმარტივე. ჩვენ ვგეგმავთ, რომ მცირე და საშუალო მეწარმეობის პულსზე გვეჭიროს ხელი და ნაკლები ბიუროკრატიით, ნაკლებ დროში, თუმცა მაღალი საბანკო სტანდარტის, სანდო, მრავალფეროვანი და ხარისხიანი მომსახურება შევთავაზოთ მომხმარებლებს.
ასევე, გვაქვს მოლოდინი, რომ მიკრობანკის სტატუსის მიღება იქნება ხელისშემწყობი ფაქტორი ფულადი სახსრების გაიაფების თვალსაზრისითაც, რაც მოგვცემს დამატებით შესაძლებლობას გავზარდოთ ჩვენი კონკურენტუნარიანობა მთლიანად საფინანსო სექტორთან მიმართებაში“, - აცხადებს ნინო დევდარიანი.
წამყვანი ევროპული საკრედიტო სარეიტინგო სააგენტო Scope Ratings საქართველოში მიკრობანკების საქმიანობის შესახებ საკანონმდებლო ჩარჩოს აფასებს. როგორც სტატიაშია აღნიშნული, კანონი საფინანსო სექტორში კონკურენტუნარიანობას გაზრდის, ხელს შეუწყობს მეწარმეებისა და თვითდასაქმებულთა მხარდაჭერასა და ეკონომიკურ ზრდას.
„საქართველოში მოქმედი მიკრობანკების შესახებ საკანონმდებლო ჩარჩო შექმნილია საფინანსო სექტორის კონკურენტუნარიანობის გასაძლიერებლად, პროდუქტების შეთავაზებებისა და მომსახურებების ასორტიმენტის გასაფართოებლად და მეწარმეებისა და თვითდასაქმებულთა მხარდასაჭერად, რაც ეკონომიკურ ზრდას შეუწყობს ხელს“, - ვკითხულობთ პუბლიკაციაში.
2024 წლის დეკემბერში, სს „მიკროსაფინანსო ორგანიზაცია მიკრო ბიზნეს კაპიტალზე“ (ემბისი) საქართველოს პირველი მიკრობანკის ლიცენზიის გაცემა მნიშვნელოვან ეტაპს წარმოადგენდა საფინანსო სექტორის განვითარებაში. ამასთან, აღნიშნულმა განაპირობა „ემბისის“ რეიტინგის გაუმჯობესება B/დადებითიდან B+/სტაბილურ დონემდე.
სტატიაში საუბარია მიკროსაფინანსო ორგანიზაციებისა და სესხის გამცემი სუბიექტების საკანონმდებლო ჩარჩოსთან შედარებით მიკრობანკების ჩარჩოს უპირატესობაზე, რაც სესხის გაცემის გაზრდილ ლიმიტს შეეხება.
Scope Ratings-ის ფინანსური ინსტიტუტების წარმომადგენელი ალვარო დომინგეს ალკალდე აღნიშნავს, რომ საქართველოში მიკროსაფინანსო ორგანიზაციებთან შედარებით, მიკრობანკები უფრო მკაცრ მარეგულირებელ მოთხოვნებს ექვემდებარებიან, რამაც უნდა შეამციროს კრედიტორთა რისკები და შესაბამისად, დროთა განმავლობაში, მიკრობანკებისთვის დაფინანსების ხარჯები.
ავტორი იმასაც ვარაუდობს, რომ მიკრობანკების სექტორი სწრაფად გაიზრდება და 1 მილიარდი ლარის მოცულობის წლიურ ზრდას აჩვენებს.
„მიუხედავად მოლოდინისა, რომ მიკროსაფინანსო სექტორთან (რომელიც 2024 წლის სექტემბრისთვის 2.3 მილიარდს შეადგენდა) შედარებით მიკროსაბანკო სექტორი უფრო მცირე ზომის იქნება, გვჯერა, რომ უფრო დიდი მოცულობის სესხების გაცემის შესაძლებლობის ხარჯზე მიკროსაბანკო სექტორი სწრაფად გაიზრდება. დაკრედიტების მოცულობის 20%-იანი წლიური ზრდის დაშვებით, 2026 წლისთვის შესაძლოა სექტორის მოცულობამ 1 მილიარდ ლარს მიაღწიოს“, - აღნიშნულია სტატიაში.
პუბლიკაციაში ხაზგასმულია, რომ მიკროსაფინანსო ორგანიზაციების გარდა, სხვა სუბიექტებსაც შეუძლიათ მიკრობანკის საქმიანობის ლიცენზიის მისაღებად განაცხადის წარდგენა. საქართველოს ეროვნულ ბანკს, მიკრობანკის საქმიანობის ლიცენზიის გაცემისთვის საბოლოო გადაწყვეტილების მისაღებად მკაცრი, ერთწლიანი ვადა აქვს განსაზღვრული. აღსანიშნავია ისიც, რომ განაცხადის უარყოფის შემთხვევაში, ორგანიზაციებს შეუძლიათ ხელახლა გააკეთონ განაცხადი შეზღუდვების გარეშე.
Scope Ratings-ი წამყვანი ევროპული საკრედიტო სარეიტინგო სააგენტოა, რომელიც სახელმწიფოების, საფინანსო ინსტიტუტებისა და კორპორაციებისთვის დამოუკიდებელ საკრედიტო რეიტინგებს, კვლევებს და რისკების ანალიზს ამზადებს. 2023 წელს სააგენტო აღიარა ევროპის ცენტრალურმა ბანკმა, რითაც მისი საკრედიტო რეიტინგები ევროსისტემის საკრედიტო შეფასების ჩარჩოს (ECAF) მიხედვით მისაღებად იქნა მიჩნეული.
შეგახსენებთ, რომ საქართველოს ეროვნულმა ბანკმა "ემბისის“ შემდეგ მიკრობანკის ლიცენცია მიმდინარე წლის 12 თებერვალს სს "კრისტალზეც" გასცა.
უახლესი
10 საათის წინ
საქართველოდან ისრაელში ექსპორტი 35%-იან ზრდას აჩვენებს
