რა შესაძლებლობას აძლევს საქართველოს ევროპის ენერგეტიკული გაერთიანების ხელმძღვანელის სტატუსი - დავით ნარმანიას განმარტება

საქართველო მიმდინარე წელს გახდა ევროპის ენერგეტიკული გაერთიანების ხელმძღვანელი ქვეყანა, ეს საქართველოს აძლევს საშუალებას, როგორც ხელმძღვანელმა ქვეყანამ ისაუბროს ენერგეტიკული გაერთიანების ყველა წევრ ქვეყანასთან,  - ამის შესახებ „იმედის დილაში“ რუბრიკა Business Insider Georgia-ში სტუმრობისას სემეკის თავმჯდომარემ დავით ნარმანიამ განაცხადა. მისივე თქმით, საქართველოს შესაძლებლობა ეძლევა უფრო გააღრმაოს თანამშრომლობა ამ გაერთიანების წევრებთან და უფრო მჭიდროდ ითანამშრომლოს მათთან. 

„საქართველო მიმდინარე წელს გახდა ევროპის ენერგეტიკული გაერთიანების ხელმძღვანელი ქვეყანა. ეს საქართველოს აძლევს საშუალებას, როგორც ხელმძღვანელმა ქვეყანამ ისაუბროს ენერგეტიკული გაერთიანების ყველა წევრ ქვეყანასთან. ჰქონდეს მათთან თანამშრომლობა და გააღრმაოს ეს თანამშრომლობა კიდევ უფრო მეტად. ჩვენთვის ყველაზე მნიშვნელოვანი ის არის, რომ ხაზი გაესვა საქართველოში ენერგეტიკაში მიმდინარე რეფორმებს. მათ შორის ევროინტეგრაციის კონტექსტში და ამაში საკმაოდ დიდი წვლილი მთავრობასთან ერთად სემეკსაც მიუძღვის. ამიტომ ეს ჩვენთვის ძალიან მნიშვნელოვანია და მოტივატორია, რომ მომავალში კიდევ უფრო აქტიურად ვიმუშაოთ“, - აცხადებს ნარმანია.

საქართველო ენერგეტიკული გაერთიანების წევრი 2017 წელს გახდა და რეგლამენტის შესაბამისად, 2025 წელს პირველად არის ორგანიზაციის თავმჯდომარე.

ამ მოვლენასთან დაკავშირებით ოფიციალური ცერემონია ავსტრიაში, ქალაქ ვენაში გაიმართა, რომელსაც საქართველოს დელეგაციასთან ერთად ენერგეტიკული გაერთიანების წევრი ქვეყნების წარმომადგენლები ესწრებოდნენ.

ენერგეტიკული გაერთიანება არის საერთაშორისო ორგანიზაცია, რომელიც უზრუნველყოფს ევროკავშირისა და წევრი ქვეყნების ურთიერთთანამშრომლობას ენერგეტიკული უსაფრთხოების, ენერგეტიკული მდგრადობისა და გარემოსდაცვითი მიზნების მისაღწევად

ენერგეტიკულ გაერთიანებას ჰყავს ცხრა ხელშემკვრელი მხარე - საქართველო, ალბანეთი, ბოსნია და ჰერცეგოვინა, კოსოვო, ჩრდილოეთ მაკედონია, მოლდოვა, მონტენეგრო, სერბეთი და უკრაინა. აღსანიშნავია, რომ ევროკავშირი ასევე არის ენერგეტიკული გაერთიანების ხელშეკრულების მხარე და ორგანიზაციის მუდმივი ვიცე-პრეზიდენტი.

საქართველოს ენერგეტიკული გაერთიანების წევრობა და თავმჯდომარეობა კიდევ ერთხელ ადასტურებს საქართველოს ერთგულებას ევროკავშირთან ენერგეტიკული თანამშრომლობის გაღრმავების, მდგრადი ენერგეტიკული პოლიტიკის ხელშეწყობისა და ენერგეტიკული უსაფრთხოების გაძლიერების მიმართ.