სააგენტოს „აწარმოე საქართველოში“ მხარდაჭერით GULFOOD 2025-ზე 30-ზე მეტმა ქართულმა კომპანიამ მიიღო მონაწილეობა. ქართველი ექსპორტიორები (24 კომპანია) სასმელი და საკვები პროდუქტების უდიდესს საერთაშორისო გამოფენაზე წარდგნენ, სადაც ქართული დელეგაცია მრავალფეროვანი პროდუქციით იყო წარმოდგენილი. იმ კომპანიებს შორის, რომლებმაც GULFOOD-ში მიიღეს მონაწილეობა საკონდიტრო კომპანია სანდომი • Sandomi-ც იყო. გამოფენის შედეგებთან და სამომავლო გეგმებთან დაკავშირებით, Business Insider Georgia კომპანიის მარკეტინგისა და საზოგადოებასთან ურთიერთობის ხელმძღვანელს თეკლა თალაკვაძეს ესაუბრა.
მისივე თქმით, კომპანიისთვის ძალიან საინტერესო იყო მსოფლიოს ერთ-ერთ უდიდეს გამოფენაზე წარდგენა და საკუთარი პროდუქციის გაცნობა პოტენციური პარტნიორობის მიზნით.
„ჩვენთვის, როგორც ქართული კომპანიისთვის, ძალიან მნიშვნელოვანია საქართველოს ფარგლებს გარეთ პროდუქციის ექსპორტზე გატანა. სწორედ ამიტომ, ძალიან საინტერესო იყო ჩვენთვის მსოფლიოს ერთ-ერთ უდიდეს გამოფენაზე ქ.დუბაიში "Gulfood 2025"-ზე წარდგენა და საკუთარი პროდუქციის გაცნობა პოტენციური პარტნიორობის მიზნით. აუცილებლად უნდა აღვნიშნოთ სახელმწიფო უწყების "აწარმოე საქართველოში" დიდი წვლილი ჩვენს მსგავს პროექტებში ჩართვაში, რადგან მოგეხსენებათ, მათი მიზანია სამეწარმეო გარემოს გაუმჯობესება და კერძო სექტორის მაქსიმალური განვითარება, რაც ბუნებრივია ჩვენთვის, როგორც კომპანიისთვის მთავარ პრიორიტეტს წარმოადგენს. კიდევ ერთხელ მადლობა მათ, რადგან ეს ვიზიტი ჩვენთვის ნამდვილად ძალიან საინტერესო, შემეცნებითი და ნაყოფიერი აღმოჩნდა “, - ამბობს კომპანიის მარკეტინგისა და საზოგადოებასთან ურთიერთობის ხელმძღვანელი თეკლა თალაკვაძე.
კომპანიამ ასორტიმენტი გააფართოვა და ტკბილეულის ხაზის გარდა საკუთარ მომხმარებელს ამჟამად, მარილიანი „სნექის“ ხაზსაც სთავაზობს.
„გვაქვს საკმაოდ საინტერესო სიახლეები, ტკბილეულის ხაზის გარდა დავიწყეთ მარილიანი "სნექის'' ხაზის წარმოებაც, ორივე საწარმო თბილისშიც და დასავლეთ საქართველოშიც აღჭურვილია თანამედროვე, სრულად ავტომატიზებული დანადგარებით, რაც ჩვენთვის ძალიან მნიშვნელოვანია. ასევე, დავიწყეთ ჩირეულის და ტყლაპის ხაზის გაფართოებაც. რაც შეეხება ექსპორტს, ამ ეტაპზე სანდომის პროდუქცია ექსპორტზე გადის პალესტინაში, ასევე გვაქვს დაინტერესება ჩინეთიდანაც. ჩვენი პრიორიტეტული ხაზია ვაფლი, რომელიც მზადდება ევროპული ტექნოლოგიითა და რეცეპტურით და კიდევ უფრო ვგეგმავთ მის გაფართოებას“, - აცხადებს კომპანიის მარკეტინგისა და საზოგადოებასთან ურთიერთობის ხელმძღვანელი თეკლა თალაკვაძე.
ცნობისთვის, საკონდიტრო კომპანია "სანდომი" უკვე 11 წელია წარმოდგენილია ქართულ ბაზარზე საკმაოდ მრავალფეროვანი პროდუქციით. კომპანია, დაკომპლექტებულია მაღალკვალიფიკაციური სპეციალისტებით, პროფესიონალთა გუნდი უცხოელ კოლეგებთან ერთად მუდმივად მუშაობს პროდუქციის დახვეწასა და განახლებაზე. საწარმოში პერიოდულად მოწვეულნი არიან უცხოელი ტექნოლოგები. თანამშრომლები გადიან ინტენსიურ ტრენინგებს უცხოელ სპეციალისტებთან ერთად. კომპანია არის ISO:22000-2005 სტანდარტის მფლობელი, რაც იმის დასტურია, რომ სანდომი აწარმოებს უმაღლესი ხარისხის, ქართულ პროდუქტს ყველა საერთაშორისო სტანდარტის დაცვით.
უახლესი
